election

saaqī sharāb de ki election hai āj-kal

barseñge vote jis meñ vo sāvan hai āj-kal

jamhūriyat ke paañv meñ jhāñjan hai āj-kal

ye mulk us ke naach kā āñgan hai āj-kal

saudā hai leaderī kā jo dil ko satā.e hai

''dil phir tavāf-e-kū-e-malāmat ko jaa.e hai''

lo ho gayā hai uuñT election kā be-nakel

ab laTh chaleñge jalsoñ meñ ābād hoñge jail

phir leaderoñ kī hogī akhāḌoñ meñ rel-pel

votoñ kī har dukān pe hogī grand sale

votoñ se baḌh ke ab koī hathiyār bhī nahīñ

''laḌte haiñ aur haath meñ talvār bhī nahīñ''

zinda hai vo ki jis kā register meñ naam hai

aur zindagī sharīfoñ ke uupar harām hai

haiñ jis ke paas vote madār-ul-mahām hai

lailā-e-leaderī kī vo thāme lagām hai

leader ke muñh pe shahar ke kūchoñ kī gard hai

''ishq-e-nabard-pesha talabgār-e-mard hai''

vaqt aa gayā zamīr kī bai-o-ḳharīd kā

import ke licence ke va.ade-va.īd kā

din hai birādrī o qabā.il kī iid kā

aapas meñ gallabānoñ kī guft-o-shunīd kā

muslim ko be-shak aisī musāvāt chāhiye

''ārif hamesha mast-e-mai-e-zāt chāhiye''

dañggal kī kashtiyoñ meñ har ik chiiz hai ravā

ya.anī milegī millat-e-āsī ko har davā

naġhme kā daur, daur-e-mai-o-raqs kā mazā

jis ko zabān kah na sake us se bhī sivā

likkhā huā hai qismat-e-ummīd-vār meñ

''uḌtī phiregī ḳhaak tirī kū-e-yār meñ''

ahl-e-basīrat ab nahīñ dekheñge khoT ko

hāsil kareñge laakh tarīqoñ se vote ko

paanī hī kī tarah se bahā.enge note ko

rokeñgi zar kī Dhaal pe dushman kī choT ko

voter ko baḳhshā jā.egā bhārī mushāhra

phir jiit kī ḳhushī meñ kareñge mushā.era

ā.eñge vote dene ko jab jāhilān-e-qaum

un ko dikhā.e jā.eñge pahle nishān-e-qaum

gaiñDā nishān rakkhegā ik pahlavān-e-qaum

hai uuñT koī koī yake-az-ḳharān-e-qaum

insāniyat kī qaid se sab ho ga.e barī

un kā mua.ālijā ho to hogā veterinary

saqi sharab de ki election hai aaj-kal

barsenge wote jis mein wo sawan hai aaj-kal

jamhuriyat ke panw mein jhanjan hai aaj-kal

ye mulk us ke nach ka aangan hai aaj-kal

sauda hai leaderi ka jo dil ko satae hai

dil phir tawaf-e-ku-e-malamat ko jae hai

lo ho gaya hai unT election ka be-nakel

ab laTh chalenge jalson mein aabaad honge jail

phir leaderon ki hogi akhaDon mein rel-pel

woton ki har dukan pe hogi grand sale

woton se baDh ke ab koi hathiyar bhi nahin

laDte hain aur hath mein talwar bhi nahin

zinda hai wo ki jis ka register mein nam hai

aur zindagi sharifon ke upar haram hai

hain jis ke pas wote madar-ul-maham hai

laila-e-leaderi ki wo thame lagam hai

leader ke munh pe shahar ke kuchon ki gard hai

ishq-e-nabard-pesha talabgar-e-mard hai

waqt aa gaya zamir ki bai-o-KHarid ka

import ke licence ke wade-waid ka

din hai biradri o qabail ki id ka

aapas mein gallabanon ki guft-o-shunid ka

muslim ko be-shak aisi musawat chahiye

aarif hamesha mast-e-mai-e-zat chahiye

danggal ki kashtiyon mein har ek chiz hai rawa

yani milegi millat-e-asi ko har dawa

naghme ka daur, daur-e-mai-o-raqs ka maza

jis ko zaban kah na sake us se bhi siwa

likkha hua hai qismat-e-ummid-war mein

uDti phiregi KHak teri ku-e-yar mein

ahl-e-basirat ab nahin dekhenge khoT ko

hasil karenge lakh tariqon se wote ko

pani hi ki tarah se bahaenge note ko

rokengi zar ki Dhaal pe dushman ki choT ko

woter ko baKHsha jaega bhaari mushahra

phir jit ki KHushi mein karenge mushaera

aaenge wote dene ko jab jahilan-e-qaum

un ko dikhae jaenge pahle nishan-e-qaum

gainDa nishan rakkhega ek pahlawan-e-qaum

hai unT koi koi yake-az-KHaran-e-qaum

insaniyat ki qaid se sab ho gae bari

un ka muaalija ho to hoga weterinary