emergency se pahle emergency ke baad

kal thī hamāre vāste tārīkiyoñ kī shab

ġhārat-garī thī luuT thī vahshat kā daur thā

pas-māñdagān-e-vaqt kī aahoñ kā shor thā

āsūdgī ke naam pe dhoke hue the kal

insāniyat ke naam pe insāñ kā kaal thā

har koī fikrmand pareshān-hāl thā

ahl-e-vatan malūl bhī aise malūl the

chehre the ashk ashk magar ḳhushk phuul the

jiinā ġharīb ke liye dushvār kaam thā

jiine kī istilāh meñ jiinā harām thā

siine meñ un ke saañs bahut tang tang thī

jaise ḳhud apne aap se ik jang jang thī

aise meñ shāntī kā nayā daur aa gayā sūraj huā falak pe nayā aas kā tulūa

tārīkiyāñ jo shab kī thiiñ din meñ badal ga.iiñ

jitnī thiiñ āfateñ vo tadabbur se Tal ga.iiñ

jiinā har ik ke vāste āsān ho gayā

vīrāna-e-hayāt

gulistān ho gayā

bint-e-gulāb paikar-e-amn-o-amāñ hai aaj

jannat-nishān vāqa.ī hindostāñ hai aaj

kal thi hamare waste tarikiyon ki shab

ghaarat-gari thi luT thi wahshat ka daur tha

pas-mandagan-e-waqt ki aahon ka shor tha

aasudgi ke nam pe dhoke hue the kal

insaniyat ke nam pe insan ka kal tha

har koi fikrmand pareshan-haal tha

ahl-e-watan malul bhi aise malul the

chehre the ashk ashk magar KHushk phul the

jina gharib ke liye dushwar kaam tha

jine ki istilah mein jina haram tha

sine mein un ke sans bahut tang tang thi

jaise KHud apne aap se ek jang jang thi

aise mein shanti ka naya daur aa gaya suraj hua falak pe naya aas ka tulua

tarikiyan jo shab ki thin din mein badal gain

jitni thin aafaten wo tadabbur se Tal gain

jina har ek ke waste aasan ho gaya

virana-e-hayat

gulistan ho gaya

bint-e-gulab paikar-e-amn-o-aman hai aaj

jannat-nishan waqai hindostan hai aaj