etizar

tum samajhtī ho ye gul-dān meñ hañste hue phuul

merī afsurdagi-e-dil ko miTā hī deñge

ye hasīñ phuul ki haiñ jān-e-gulistān-e-bahār

mere so.e hue naġhmoñ ko jagā hī deñge

tum ne dekhī haiñ damaktī huī sham.eñ lekin

tum ne dekhe nahīñ bujhte hue dīpak hamdam

vahī dīpak jo nigāhoñ kā sahārā pā kar

ek lamhe ke liye jalte haiñ bujh jaate haiñ

kabhī ik ashk se dhul jaate haiñ sadiyoñ ke ġhubār

kā.enāt aur nikhar aur sañvar jaatī hai

kabhī nākām tamannā kī sadā-e-mub.ham

qahqaha ban ke fazāoñ meñ bikhar jaatī hai

TūTte tāroñ ke sañgīt sune haiñ tum ne

vo bhī naġhme haiñ jo hoñToñ se gurezāñ hī rahe

phaḌ.phaḌāte hue dekhe haiñ fazāoñ meñ kabhī

vo fasāne jo nigāhoñ se bayāñ ho na sake

kabhī kāñToñ se bahal jaatī hai rūh-e-ġhamgīñ

aur ma.asūm shagūfoñ kī rasīlī ḳhushbū

neshtar ban ke rag-e-jāñ meñ utar jaatī hai

haañ yahī phuul yahī jān-e-gulistān-e-bahār

naag ban kar kabhī ehsās ko Das lete haiñ

tum samajhti ho ye gul-dan mein hanste hue phul

meri afsurdagi-e-dil ko miTa hi denge

ye hasin phul ki hain jaan-e-gulistan-e-bahaar

mere soe hue naghmon ko jaga hi denge

tum ne dekhi hain damakti hui shamen lekin

tum ne dekhe nahin bujhte hue dipak hamdam

wahi dipak jo nigahon ka sahaara pa kar

ek lamhe ke liye jalte hain bujh jate hain

kabhi ek ashk se dhul jate hain sadiyon ke ghubar

kaenat aur nikhar aur sanwar jati hai

kabhi nakaam tamanna ki sada-e-mubham

qahqaha ban ke fazaon mein bikhar jati hai

TuTte taron ke sangit sune hain tum ne

wo bhi naghme hain jo honTon se gurezan hi rahe

phaDphaDate hue dekhe hain fazaon mein kabhi

wo fasane jo nigahon se bayan ho na sake

kabhi kanTon se bahal jati hai ruh-e-ghamgin

aur masum shagufon ki rasili KHushbu

neshtar ban ke rag-e-jaan mein utar jati hai

han yahi phul yahi jaan-e-gulistan-e-bahaar

nag ban kar kabhi ehsas ko Das lete hain