europe ki pahli jhalak

bād-o-bārāñ se ulajhtā ḳhanda-zan girdāb par

ik jazīra tairtā jaatā hai sat.h-e-āb par

gum ka.ī sadiyoñ kā us meñ jazba-e-tahqīq hai

ye jazīra aadmī ke zehn kī taḳhlīq hai

jā rahā hai har ghaḌī maujoñ se Takrātā huā

apne hī andāz meñ apnā rajaz gaatā huā

bahr kī amvāj par bahte hue shahr-e-jamīl

har qadam terā liye hai terī azmat kī dalīl

āñdhiyoñ kā zor, maujoñ kī ravānī tujh meñ hai

irtiqā-e-zehn-e-insāñ kī kahānī tujh meñ hai

har bhañvar meñ aur har tūfān meñ sāhil hai tū

sīna-e-imroz-o-fardā kā dhaḌaktā dil hai tū

to tajallī hī tajallī hai añdherī raat meñ

raushnī kā hai manāra ālam-e-zulmāt meñ

raat aa.ī jaag uThā insāñ kā zauq-e-be-bisāt

āḳhirī is kā Thikāna mard o zan kā iḳhtilāt

kis qadar arzāñ hue tahzīb ke lam.āt-e-nūr

allāh allāh chaar jānib raushnī kā ye vafūr

is tarah se maiñ ne kab dekhī thī mai-ḳhāne meñ dhuum

auratoñ mardoñ kā laḌkoñ laḌkiyoñ kā ye hujūm

sab nashe meñ mast haiñ lekin haiñ kitne bā-ḳhabar

phir rahe haiñ sab ke sab ik dūsre ko thaam kar

ahmarīñ sāġhar, lab-e-lālīñ, nigāheñ mai-farosh

har taraf hai ek mastī, har taraf hai ik ḳharosh

is jagah idrāk se begāna koī bhī nahīñ

sab haiñ farzāne yahāñ dīvāna koī bhī nahīñ

aql kī is bazm meñ dīvāngī kā kaam kyā

DhūñDhtā hai tū yahāñ aa kar dil-e-nākām kyā

itnī āgāhī kisī ko ho ye mohlat hī nahīñ

kis kī bāheñ kis kī gardan meñ hamā.il ho ga.iiñ

aa ke āġhosh-e-havas meñ ḳhud yahāñ girtā hai husn

kis qadar kachche sahāre DhūñDhtā phirtā hai husn

jis se ḳhīra terī āñkheñ haiñ chamak europe kī hai

dekh ai 'āzād'! ye pahlī jhalak europe kī hai

baad-o-baran se ulajhta KHanda-zan girdab par

ek jazira tairta jata hai sath-e-ab par

gum kai sadiyon ka us mein jazba-e-tahqiq hai

ye jazira aadmi ke zehn ki taKHliq hai

ja raha hai har ghaDi maujon se Takraata hua

apne hi andaz mein apna rajaz gata hua

bahr ki amwaj par bahte hue shahr-e-jamil

har qadam tera liye hai teri azmat ki dalil

aandhiyon ka zor, maujon ki rawani tujh mein hai

irtiqa-e-zehn-e-insan ki kahani tujh mein hai

har bhanwar mein aur har tufan mein sahil hai tu

sina-e-imroz-o-farda ka dhaDakta dil hai tu

to tajalli hi tajalli hai andheri raat mein

raushni ka hai manara aalam-e-zulmat mein

raat aai jag uTha insan ka zauq-e-be-bisat

aaKHiri is ka Thikana mard o zan ka iKHtilat

kis qadar arzan hue tahzib ke lamat-e-nur

allah allah chaar jaanib raushni ka ye wafur

is tarah se main ne kab dekhi thi mai-KHane mein dhum

auraton mardon ka laDkon laDkiyon ka ye hujum

sab nashe mein mast hain lekin hain kitne ba-KHabar

phir rahe hain sab ke sab ek dusre ko tham kar

ahmarin saghar, lab-e-lalin, nigahen mai-farosh

har taraf hai ek masti, har taraf hai ek KHarosh

is jagah idrak se begana koi bhi nahin

sab hain farzane yahan diwana koi bhi nahin

aql ki is bazm mein diwangi ka kaam kya

DhunDhta hai tu yahan aa kar dil-e-nakaam kya

itni aagahi kisi ko ho ye mohlat hi nahin

kis ki bahen kis ki gardan mein hamail ho gain

aa ke aaghosh-e-hawas mein KHud yahan girta hai husn

kis qadar kachche sahaare DhunDhta phirta hai husn

jis se KHira teri aankhen hain chamak europe ki hai

dekh ai 'azad'! ye pahli jhalak europe ki hai