mulaqat

raat sannāTā dar-o-bām ke hoñToñ pe sukūt

rāheñ chup-chāp haiñ patthar ke butoñ kī mānind

raushnī tāqatoñ meñ alsā.ī huī baiThī hai

niiñd āñkhoñ ke darīchoñ se lagī baiThī hai

din ke hañgāmoñ kī raunaq ko bujhe der huī

chāñd ko nikle sitāroñ ko saje der huī

ab kisī chashm-e-nigah-dār kā ḳhatra bhī nahīñ

vaqt ke haath meñ ab sañg-e-malāmat bhī nahīñ

dil jo machle to koī Tokne vaalā bhī nahīñ

jism pighle to koī dekhne vaalā bhī nahīñ

ai nigār-e-dil-o-jāñ shauq kī bāhoñ meñ machal

saaya saaya yūñhī āġhosh-e-chaman-zār meñ chal

din sitam-pesha hai rāzoñ ko ugal detā hai

raat ma.asūm hai rāzoñ ko chhupā letī hai

raat sannaTa dar-o-baam ke honTon pe sukut

rahen chup-chap hain patthar ke buton ki manind

raushni taqaton mein alsai hui baiThi hai

nind aankhon ke darichon se lagi baiThi hai

din ke hangamon ki raunaq ko bujhe der hui

chand ko nikle sitaron ko saje der hui

ab kisi chashm-e-nigah-dar ka KHatra bhi nahin

waqt ke hath mein ab sang-e-malamat bhi nahin

dil jo machle to koi Tokne wala bhi nahin

jism pighle to koi dekhne wala bhi nahin

ai nigar-e-dil-o-jaan shauq ki bahon mein machal

saya saya yunhi aaghosh-e-chaman-zar mein chal

din sitam-pesha hai raazon ko ugal deta hai

raat masum hai raazon ko chhupa leti hai