farisa mahdubani se

madhūbanī

apnī ghoḌī ko dauḌāo nahīñ madhūbanī

pas ho jaao us par halke se savār

aur chhoḌ do use khulā

aur dekho

vo tumheñ kin hairat-añgez murġh-zāroñ kī

sair karātī hai

madhūbanī

bharosa rakho madhūbanī

aur sauñp do us ko apnā aap

tarovar ke us paat kī tarah

jo apnī qaid se āzād ho kar

apne aap ko kar detā hai

pavan ke ġhazāl ke havāle

madhūbanī

Daro nahīñ madhūbanī

aur rahne do apnī ghoḌī ko be-lagām

ki vo apnī mastī meñ

tumheñ ek rāz-bhare jangal kī sair karā.egī

aur le jā.egī un ḳhufiya maqāmāt tak

jahāñ use maġhlūb kar ke

tum kabhī nahīñ pahuñch saktīñ

ki madhūbanī

chaqmaq kī chaTTān ke pīchhe raste jhilmilāte pāniyoñ ke jin chashmoñ se piitī hai vo amrit

aur jin jharnoñ-bhare sarsabz kohistānoñ meñ

vo letī hai añgḌā.iyāñ apnī saheliyoñ ke saath

tum use lagām de kar

kabhī vahāñ tak nahīñ pahuñch saktīñ

pas sivā.e is ke

ki ban jaao tum bhī

us kī sakhī

madhūbanī

registānoñ kī sair ko niklo madhūbanī

aur savār ho jaao ūñTnī par

aur banāo use apnī mādar

ki vo apne mīThe duudh meñ ghulī

shītal raat sahrā kī

tum par khole

aur jaan meñ tumhārī

dasht kī mamtā ke raaz ghole

madhūbanī

apnī maañ ko nath pahnāo madhūbanī

ki suukh jā.egā duudh us kā

aur na pahuñch pā.egī vo kabhī

naḳhlistān ke pardoñ meñ chhupī us jhiil tak

jahāñ vo sirf

apne bachchoñ ko sairāb kartī hai

madhūbanī

sāhiloñ ko pahuñcho madhūbanī

aur ird-gird beloñ meñ paḌe sūkhe baañs ikaTThe karo

aur phir

unheñ taaḌ kī utrī chhāl se bāñdh kar

ek taḳht banāo

aur us ko apnā bichhaunā kar ke

dariyāoñ meñ utar jaao

aur khelo un kī maujoñ se

ki vo tumheñ apnā banā kar

apne ThaThoñ meñ jhūle jhulā.eñ

aur sunā.eñ tumheñ

jaltarangī loriyāñ

madhūbanī

jhiḌak do apne aap se

ḳhauf kī sab beḌiyāñ

aur utaar pheñko ye

sattā kā chhal jaal

mat karo madhūbanī

aisī kashtī kā kashT

jo de tumheñ dariyāoñ pe

hukmrānī kā gumān

ki raaj paaT kī is moh maayā meñ

tumhārā taḳhta

yaqīnan ulTā jā.egā

to madhubanī

pas de do apne aap ko

dhartī kī āġhosh meñ

jo hai tumhārī

pālanhār

aur apne dil se nikāl do

apnī mādar-e-pur-rahmat ko

musaḳhḳhar karne kā ḳhayāl

ki tum janī ho

usī ke giile raham kī

aur lauT jāogī jald

us ke

sūkhe raham meñ

madhubani

apni ghoDi ko dauDao nahin madhubani

pas ho jao us par halke se sawar

aur chhoD do use khula

aur dekho

wo tumhein kin hairat-angez murgh-zaron ki

sair karaati hai

madhubani

bharosa rakho madhubani

aur saunp do us ko apna aap

tarowar ke us pat ki tarah

jo apni qaid se aazad ho kar

apne aap ko kar deta hai

pawan ke ghazal ke hawale

madhubani

Daro nahin madhubani

aur rahne do apni ghoDi ko be-lagam

ki wo apni masti mein

tumhein ek raaz-bhare jangal ki sair karaegi

aur le jaegi un KHufiya maqamat tak

jahan use maghlub kar ke

tum kabhi nahin pahunch saktin

ki madhubani

chaqmaq ki chaTTan ke pichhe raste jhilmilate paniyon ke jin chashmon se piti hai wo amrit

aur jin jharnon-bhare sarsabz kohistanon mein

wo leti hai angDaiyan apni saheliyon ke sath

tum use lagam de kar

kabhi wahan tak nahin pahunch saktin

pas siwae is ke

ki ban jao tum bhi

us ki sakhi

madhubani

registanon ki sair ko niklo madhubani

aur sawar ho jao unTni par

aur banao use apni madar

ki wo apne miThe dudh mein ghuli

shital raat sahra ki

tum par khole

aur jaan mein tumhaari

dasht ki mamta ke raaz ghole

madhubani

apni man ko nath pahnao madhubani

ki sukh jaega dudh us ka

aur na pahunch paegi wo kabhi

naKHlistan ke pardon mein chhupi us jhil tak

jahan wo sirf

apne bachchon ko sairab karti hai

madhubani

sahilon ko pahuncho madhubani

aur ird-gird belon mein paDe sukhe bans ikaTThe karo

aur phir

unhen taD ki utri chhaal se bandh kar

ek taKHt banao

aur us ko apna bichhauna kar ke

dariyaon mein utar jao

aur khelo un ki maujon se

ki wo tumhein apna bana kar

apne ThaThon mein jhule jhulaen

aur sunaen tumhein

jaltarangi loriyan

madhubani

jhiDak do apne aap se

KHauf ki sab beDiyan

aur utar phenko ye

satta ka chhal jal

mat karo madhubani

aisi kashti ka kashT

jo de tumhein dariyaon pe

hukmrani ka guman

ki raj paT ki is moh maya mein

tumhaara taKHta

yaqinan ulTa jaega

to madhubani

pas de do apne aap ko

dharti ki aaghosh mein

jo hai tumhaari

palanhaar

aur apne dil se nikal do

apni madar-e-pur-rahmat ko

musaKHKHar karne ka KHayal

ki tum jani ho

usi ke gile raham ki

aur lauT jaogi jald

us ke

sukhe raham mein