faisla

ujāle chhīn lo mujh se mujhe tārīkiyāñ de do

basīrat naqsh-e-be-ma.anī

rifāqat sāya-e-mub.ham

maiñ apne aap meñ TuuTā huā paikar

mujhe manzūr apnī zindagī se thak gayā huuñ maiñ

mirī pahchān shāyad kho ga.ī anjān rāhoñ meñ

maiñ apne zehn kī gahrā.iyoñ meñ bikhrā bikhrā muzmahil lamha

mirī āñkhoñ ne andhe ḳhvāb dikhlā.e

chamaktī ret ko dariyā kahā maiñ ne

sulagtī dhuup ko saayā kahā maiñ ne

maiñ nādāñ thā ki maiñ ne mausamoñ se apnā-pan māñgā

ye ḳhushbū to faqat ehsās hai aur kuchh nahīñ shāyad

ye sūraj ye samundar ye havā ye raushnī saarī

nahīñ mere liye kuchh bhī

koī rishta nahīñ merā kisī se bhī

aqā.ed tajrabe jhoñke havāoñ ke

har ik saaya parāyā hai

har ik ummīd jhūTī hai

maiñ tanhā hī chalā thā apne ghar se jab chalā thā maiñ

rahā huuñ umr bhar tanhā

akelā hī chalā jā.ūñgā ik lambe safar par maiñ

kisī din dekh leñge sab

na khulvāo zabāñ merī

likhī hai āñsūoñ ne dāstāñ merī

har ik kāvish ga.ī hai rā.egāñ merī

nahīñ ta.abīr koī mere ḳhvāboñ kī

nahīñ qīmat yahāñ merī kitāboñ kī

paḌhā kis ne mujhe āḳhir

likhā hai jis qadar maiñ ne

mujhe lagtā hai sab dhuñdlī lakīreñ haiñ

yahāñ ke saare dānish-var yahāñ ke saare dīda-var

sabhī ahl-e-basīrat ahl-e-dil mīnār azmat ke

merī sūrat to kyā hai naam se vāqif nahīñ koī

yahī ehsāñ karo mujh par mire sab harf jhuTlā do

mujhe gumnāmiyoñ meñ dafn kar do aur itrāo

ujale chhin lo mujh se mujhe tarikiyan de do

basirat naqsh-e-be-mani

rifaqat saya-e-mubham

main apne aap mein TuTa hua paikar

mujhe manzur apni zindagi se thak gaya hun main

meri pahchan shayad kho gai anjaan rahon mein

main apne zehn ki gahraiyon mein bikhra bikhra muzmahil lamha

meri aankhon ne andhe KHwab dikhlae

chamakti ret ko dariya kaha main ne

sulagti dhup ko saya kaha main ne

main nadan tha ki main ne mausamon se apna-pan manga

ye KHushbu to faqat ehsas hai aur kuchh nahin shayad

ye suraj ye samundar ye hawa ye raushni sari

nahin mere liye kuchh bhi

koi rishta nahin mera kisi se bhi

aqaed tajrabe jhonke hawaon ke

har ek saya paraya hai

har ek ummid jhuTi hai

main tanha hi chala tha apne ghar se jab chala tha main

raha hun umr bhar tanha

akela hi chala jaunga ek lambe safar par main

kisi din dekh lenge sab

na khulwao zaban meri

likhi hai aansuon ne dastan meri

har ek kawish gai hai raegan meri

nahin tabir koi mere KHwabon ki

nahin qimat yahan meri kitabon ki

paDha kis ne mujhe aaKHir

likha hai jis qadar main ne

mujhe lagta hai sab dhundli lakiren hain

yahan ke sare danish-war yahan ke sare dida-war

sabhi ahl-e-basirat ahl-e-dil minar azmat ke

meri surat to kya hai nam se waqif nahin koi

yahi ehsan karo mujh par mere sab harf jhuTla do

mujhe gumnamiyon mein dafn kar do aur itrao