fana ka safar

us kī ḳhvāhish kā iz.hār

ma.asūm had tak rivāyat kī bandish meñ uljhā huā thā

ki maiñ us ke hāthoñ pe mehñdī lagā.ūñ

magar shā.erī ek devī hai jis kī jalan ko

kabhī likhne vāloñ ke hāthoñ pe itnā taras hī nahīñ aa sakā hai

ki bāġhī dimāġhoñ meñ bhī aam rastoñ kī taqlīd bhartī

yā hāthoñ kī jumbish ḳhirad ke tasallut se āzād kartī

mire haath bhī zehn meñ ghūmte kuchh savāloñ ke sāñche banāne lage

us ke hāthoñ pe mehñdī se atom ke model banāne lage

aur model bhī aise jo matrūk the

jis meñ zarra bahut duur se ghūmtā jhūmtā dā.era dā.era

rafta rafta kisī markaze kī taraf gāmzan

bas tasalsul se baḌhtī huī ik kashish ke asar meñ rahe

ik yaqīnī fanā ke safar meñ rahe

sāl-hā-sāl chīzeñ badaltī ga.iiñ

vaqt ne dard ke jo bhī lyrics likhe un ko gaanā paḌā

jaane kaise magar

us ko jaanā paḌā

maiñ ne vaise to ye umr bhar sochnā hī nahīñ thā

magar shā.erī ek devī jalan

nostalgic zamānoñ kī tasvīr logic ke kuchh mas.ale

pūchhne lag ga.e haiñ

bhalā aisā jāhil kahāñ par milegā

ki jo kīmiyā paḌh ke bhī

ik ta'alluq meñ pahle to zarra bane

aur nibhāte hue

dynamics ke vo hī matrūk model chune

aur tasalsul se baḌhtī huī ik kashish ke asar meñ rahe

ik yaqīnī fanā ke safar meñ rahe

us ki KHwahish ka izhaar

masum had tak riwayat ki bandish mein uljha hua tha

ki main us ke hathon pe mehndi lagaun

magar shaeri ek dewi hai jis ki jalan ko

kabhi likhne walon ke hathon pe itna taras hi nahin aa saka hai

ki baghi dimaghon mein bhi aam raston ki taqlid bharti

ya hathon ki jumbish KHirad ke tasallut se aazad karti

mere hath bhi zehn mein ghumte kuchh sawalon ke sanche banane lage

us ke hathon pe mehndi se atom ke model banane lage

aur model bhi aise jo matruk the

jis mein zarra bahut dur se ghumta jhumta daera daera

rafta rafta kisi markaze ki taraf gamzan

bas tasalsul se baDhti hui ek kashish ke asar mein rahe

ek yaqini fana ke safar mein rahe

sal-ha-sal chizen badalti gain

waqt ne dard ke jo bhi lyrics likhe un ko gana paDa

jaane kaise magar

us ko jaana paDa

main ne waise to ye umr bhar sochna hi nahin tha

magar shaeri ek dewi jalan

nostalgic zamanon ki taswir logic ke kuchh masale

puchhne lag gae hain

bhala aisa jahil kahan par milega

ki jo kimiya paDh ke bhi

ek ta'alluq mein pahle to zarra bane

aur nibhate hue

dynamics ke wo hi matruk model chune

aur tasalsul se baDhti hui ek kashish ke asar mein rahe

ek yaqini fana ke safar mein rahe