farar

TuuTe phūTe va.adoñ se

ḳhush-fahmiyoñ kā kashkol sajā.e

mujh meñ rahne kī ḳhātir tum aa.e

is se pahle maiñ darvāza kholūñ

kuchh bolūñ

afvāhoñ kī gard meñ lipTe zahr-ālūd mohabbat-nāme liye hue tum

udhḌe hue rishtoñ ke jaame siye hue tum

mujh meñ aan samā.e

maiñ rahne ke liye banā huuñ

jo aa.e mujh meñ rah jaa.e

mujhe sajā.e

jitnā pyaar kare utnā sukh paa.e

tum se pahle bhī kuchh log yūñhī aa.e the

apne andar mujh meñ tabdīlī ke ḳhvāb sajā laa.e the

aur phir ik din

jis ne jo bhī ahd kyā vo toḌ diyā

jis ne jo bhī baat kahī vo radd kar dī

lekin tum ne to had kar dī

mere din vīrān hue haiñ

merī sub.h ke chehre par kitnī rātoñ ke zaḳhm lage haiñ

merī shaam udaas khaḌī hai

mere ufuq par sūraj lahūluhān paḌā hai

dīvāroñ se ḳhuuñ ristā hai

darvāzoñ se merā ik ik raaz ayaañ hai

mere sahn meñ dushman kī sāzish raqsāñ hai

sunā hai ab is haal meñ mujh ko chhoḌ ke tum jaane vaale ho

mere bāhar baiTh ke merī yaad kā ġham khāne vaale ho

tum se aur ummīd bhī kyā ho

tum bhī to duniyā vaale ho

jab tak ishq se ishq nahīñ miltā tanhā dukh sahnā hai

ghar kī fikr to us ko hogī jis ko ghar meñ rahnā hai

TuTe phuTe wadon se

KHush-fahmiyon ka kashkol sajae

mujh mein rahne ki KHatir tum aae

is se pahle main darwaza kholun

kuchh bolun

afwahon ki gard mein lipTe zahr-alud mohabbat-name liye hue tum

udhDe hue rishton ke jame siye hue tum

mujh mein aan samae

main rahne ke liye bana hun

jo aae mujh mein rah jae

mujhe sajae

jitna pyar kare utna sukh pae

tum se pahle bhi kuchh log yunhi aae the

apne andar mujh mein tabdili ke KHwab saja lae the

aur phir ek din

jis ne jo bhi ahd kya wo toD diya

jis ne jo bhi baat kahi wo radd kar di

lekin tum ne to had kar di

mere din viran hue hain

meri subh ke chehre par kitni raaton ke zaKHm lage hain

meri sham udas khaDi hai

mere ufuq par suraj lahuluhan paDa hai

diwaron se KHun rista hai

darwazon se mera ek ek raaz ayan hai

mere sahn mein dushman ki sazish raqsan hai

suna hai ab is haal mein mujh ko chhoD ke tum jaane wale ho

mere bahar baiTh ke meri yaad ka gham khane wale ho

tum se aur ummid bhi kya ho

tum bhi to duniya wale ho

jab tak ishq se ishq nahin milta tanha dukh sahna hai

ghar ki fikr to us ko hogi jis ko ghar mein rahna hai