fareb

(1)

nā-gahāñ shor huā

lo shab-e-tār-e-ġhulāmī kī sahar aa pahuñchī

uñgliyāñ jaag uThīñ

barbat o tā.ūs ne añgḌā.ī lī

aur mutrib kī hathelī se shuā.eñ phūTīñ

khil ga.e saaz meñ naġhmoñ ke mahakte hue phuul

log chillā.e ki fariyād ke din biit ga.e

rāhzan haar ga.e

rāh-rau jiit ga.e

qāfile duur the manzil se bahut duur magar

ḳhud-farebī kī ghanī chhāñv meñ dam lene lage

chun liyā raah ke rezoñ ko ḳhazaf-rezoñ ko

aur samajh baiThe ki bas la.al-o-javāhar haiñ yahī

rāhzan hañsne lage chhup ke kamīñ-gāhoñ meñ

ham-nashīñ ye thā farañgī kī firāsat kā tilism

rahbar-e-qaum kī nākāra qayādat kā fareb

ham ne āzurdagī-e-shauq ko manzil jaanā

apnī hī gard-e-sar-e-rāh ko mahmil jaanā

gardish-e-halqa-e-gardāb ko sāhil jaanā

ab jidhar dekho udhar maut hī mañDlātī hai

dar-o-dīvār se rone kī sadā aatī hai

ḳhvāb zaḳhmī haiñ umañgoñ ke kaleje chhalnī

mere dāman meñ haiñ zaḳhmoñ ke dahakte hue phuul

ḳhuun meñ luThḌe hue phuul

maiñ jinheñ kūcha-o-bāzār se chun laayā huuñ

qaum ke rāhbaro rāhzanoñ

apne aivān-e-hukūmat meñ sajā lo in ko

apne guldān-e-siyāsat meñ lagā lo in ko

apnī sad-sāla tamannāoñ kā hāsil hai yahī

mauj-e-pāyāb kā sāhil hai yahī

tum ne firdaus ke badle meñ jahannam le kar

kah diyā ham se gulistāñ meñ bahār aa.ī hai

chand sikkoñ ke evaz chand miloñ kī ḳhātir

tum ne nāmūs-e-shahīdān-e-vatan bech diyā

bāġhbāñ ban ke uThe aur chaman biich diyā

(2)

kaun āzād huaa?

kis ke māthe se siyāhī chhūTī

mere siine meñ abhī dard hai mahkūmī kā

mother-e-hind ke chehre pe udāsī hai vahī

ḳhanjar āzād haiñ sīnoñ meñ utarne ke liye

maut āzād hai lāshoñ pe guzarne ke liye

chor-bāzāroñ meñ bad-shakl chuḌailoñ kī tarah

qīmateñ kaalī dukānoñ pe khaḌī rahtī haiñ

har ḳharīdār kī jeboñ ko katarne ke liye

kār-ḳhānoñ pe lagā rahtā hai

saañs letī huī lāshoñ kā hujūm

biich meñ un ke phirā kartī hai bekārī bhī

apnā ḳhuñḳhār dahan khole hue

aur sone ke chamakte sikke

Dañk uThā.e hue phan phailā.e

ruuh aur dil pe chalā karte haiñ

mulk aur qaum ko din raat Dasā karte haiñ

roTiyāñ chakloñ kī qahbā.eñ haiñ

jin ko sarmāya ke dallāloñ ne

naf.a-ḳhorī ke jharokoñ meñ sajā rakhā hai

bāliyāñ dhaan kī gehūñ ke sunahre ḳhoshe

misr o yūnān ke majbūr ġhulāmoñ kī tarah

ajnabī des ke bāzāroñ meñ bik jaate haiñ

aur bad-baḳht kisānoñ kī bilaktī huī ruuh

apne aflās meñ muñh Dhāñp ke so jaatī hai

ham kahāñ jaa.eñ kaheñ kis se ki nādār haiñ ham

kis ko samjhā.eñ ġhulāmī ke gunahgār haiñ ham

tauq ḳhud ham ne pahnā rakkhā hai armānoñ ko

apne siine meñ jakaḌ rakkhā tūfānoñ ko

ab bhī zindān-e-ġhulāmī se nikal sakte haiñ

apnī taqdīr ko ham aap badal sakte haiñ

(3)

aaj phir hotī haiñ zaḳhmoñ se zabāneñ paidā

tīra-o-tār fazāoñ se barsātā hai lahū

raah kī gard ke nīche se ubharte haiñ qadam

taare ākāsh pe kamzor habāboñ kī tarah

shab ke sailāb-e-siyāhī meñ bahe jaate haiñ

phūTne vaalī hai mazdūr ke māthe se kiran

surḳh parcham ufuq-e-sub.h pe lahrāte haiñ

(1)

na-gahan shor hua

lo shab-e-tar-e-ghulami ki sahar aa pahunchi

ungliyan jag uThin

barbat o taus ne angDai li

aur mutrib ki hatheli se shuaen phuTin

khil gae saz mein naghmon ke mahakte hue phul

log chillae ki fariyaad ke din bit gae

rahzan haar gae

rah-rau jit gae

qafile dur the manzil se bahut dur magar

KHud-farebi ki ghani chhanw mein dam lene lage

chun liya rah ke rezon ko KHazaf-rezon ko

aur samajh baiThe ki bas lal-o-jawahar hain yahi

rahzan hansne lage chhup ke kamin-gahon mein

ham-nashin ye tha farangi ki firasat ka tilism

rahbar-e-qaum ki nakara qayaadat ka fareb

hum ne aazurdagi-e-shauq ko manzil jaana

apni hi gard-e-sar-e-rah ko mahmil jaana

gardish-e-halqa-e-gardab ko sahil jaana

ab jidhar dekho udhar maut hi manDlati hai

dar-o-diwar se rone ki sada aati hai

KHwab zaKHmi hain umangon ke kaleje chhalni

mere daman mein hain zaKHmon ke dahakte hue phul

KHun mein luThDe hue phul

main jinhen kucha-o-bazar se chun laya hun

qaum ke rahbaro rahzanon

apne aiwan-e-hukumat mein saja lo in ko

apne guldan-e-siyasat mein laga lo in ko

apni sad-sala tamannaon ka hasil hai yahi

mauj-e-payab ka sahil hai yahi

tum ne firdaus ke badle mein jahannam le kar

kah diya hum se gulistan mein bahaar aai hai

chand sikkon ke ewaz chand milon ki KHatir

tum ne namus-e-shahidan-e-watan bech diya

baghban ban ke uThe aur chaman bich diya

(2)

kaun aazad hua?

kis ke mathe se siyahi chhuTi

mere sine mein abhi dard hai mahkumi ka

mother-e-hind ke chehre pe udasi hai wahi

KHanjar aazad hain sinon mein utarne ke liye

maut aazad hai lashon pe guzarne ke liye

chor-bazaron mein bad-shakl chuDailon ki tarah

qimaten kali dukanon pe khaDi rahti hain

har KHaridar ki jebon ko katarne ke liye

kar-KHanon pe laga rahta hai

sans leti hui lashon ka hujum

bich mein un ke phira karti hai bekari bhi

apna KHunKHar dahan khole hue

aur sone ke chamakte sikke

Dank uThae hue phan phailae

ruh aur dil pe chala karte hain

mulk aur qaum ko din raat Dasa karte hain

roTiyan chaklon ki qahbaen hain

jin ko sarmaya ke dallalon ne

nafa-KHori ke jharokon mein saja rakha hai

baaliyan dhan ki gehun ke sunahre KHoshe

misr o yunan ke majbur ghulamon ki tarah

ajnabi des ke bazaron mein bik jate hain

aur bad-baKHt kisanon ki bilakti hui ruh

apne aflas mein munh Dhanp ke so jati hai

hum kahan jaen kahen kis se ki nadar hain hum

kis ko samjhaen ghulami ke gunahgar hain hum

tauq KHud hum ne pahna rakkha hai armanon ko

apne sine mein jakaD rakkha tufanon ko

ab bhi zindan-e-ghulami se nikal sakte hain

apni taqdir ko hum aap badal sakte hain

(3)

aaj phir hoti hain zaKHmon se zabanen paida

tira-o-tar fazaon se barsata hai lahu

rah ki gard ke niche se ubharte hain qadam

tare aakash pe kamzor hababon ki tarah

shab ke sailab-e-siyahi mein bahe jate hain

phuTne wali hai mazdur ke mathe se kiran

surKH parcham ufuq-e-subh pe lahraate hain