fareb-e-nazar

bhīgī bhīgī sī havā.eñ, mahkā mahkā sā chaman

chāñd kī pighlī huī chāñdī se dhartī sīm-tan

shāḳh ke nīche parī-paikar sā koī ḳhanda-zan

champa.ī ruḳhsār, lab rañgīñ, gulābī pairahan

maiñ ne ye samjhā ki tum ho, tum na the vo phuul thā

dhīre dhīre chehra-e-sīmīñ se sarkātā naqāb

raat mai-ḳhāne ke ik goshe se ubhrā māhtāb

phuul bikhrātā tabassum rañg barsātā shabāb

niiñd kī tarsī huī āñkhoñ pe Tapkātā sharāb

maiñ ne ye samjhā ki tum ho tum na the, vo jaam thā

shab ke siine par añdheroñ kī chaTāneñ thiiñ dharī

nā-gahāñ bādal se niklī, muskurātī ik parī

sīm-gūñ māthā, rūpahlā jism maañg afshāñ bharī

dekh kar siine meñ ThanDak aa.e āñkhoñ meñ tirī

maiñ ne ye samjhā ki tum ho tum na the vo chāñd thā

duur tāroñ se jahāñ miltī hai shām-e-rahguzar

ab bhī do parchhā.iyāñ paḌtī haiñ jis kī ḳhaak par

jis jagah mil kar gale chhūTe the ham bā-chashm-e-tar

bār-hā koī mujhe hañstā huā aayā nazar?

maiñ ne ye samjhā ki tum ho, tum kahāñ the vahm thā

husn-e-sīmīñ se fazāoñ meñ ujālā sā kiye

nashsha-e-ahd-e-javānī se pareshāñ, be-piye

surḳh āñkhoñ meñ jalā.e shām-e-mastī ke diye

koī mere paas āyā, haath meñ sāġhar liye

maiñ ne ye samjhā ki tum ho, tum kahāñ the, ḳhvāb thā

bhigi bhigi si hawaen, mahka mahka sa chaman

chand ki pighli hui chandi se dharti sim-tan

shaKH ke niche pari-paikar sa koi KHanda-zan

champai ruKHsar, lab rangin, gulabi pairahan

main ne ye samjha ki tum ho, tum na the wo phul tha

dhire dhire chehra-e-simin se sarkata naqab

raat mai-KHane ke ek goshe se ubhra mahtab

phul bikhraata tabassum rang barsata shabab

nind ki tarsi hui aankhon pe Tapkata sharab

main ne ye samjha ki tum ho tum na the, wo jam tha

shab ke sine par andheron ki chaTanen thin dhari

na-gahan baadal se nikli, muskuraati ek pari

sim-gun matha, rupahla jism mang afshan bhari

dekh kar sine mein ThanDak aae aankhon mein teri

main ne ye samjha ki tum ho tum na the wo chand tha

dur taron se jahan milti hai sham-e-rahguzar

ab bhi do parchhaiyan paDti hain jis ki KHak par

jis jagah mil kar gale chhuTe the hum ba-chashm-e-tar

bar-ha koi mujhe hansta hua aaya nazar?

main ne ye samjha ki tum ho, tum kahan the wahm tha

husn-e-simin se fazaon mein ujala sa kiye

nashsha-e-ahd-e-jawani se pareshan, be-piye

surKH aankhon mein jalae sham-e-masti ke diye

koi mere pas aaya, hath mein saghar liye

main ne ye samjha ki tum ho, tum kahan the, KHwab tha