fariyaad-e-bewa

beva haiñ nāla-e-ġham hai bā-asar hamārā

taḌpā.egā diloñ ko dard-e-jigar hamārā

sartāj uTh gayā hai āḳhir kidhar hamārā

vīrāñ ho gayā hai ābād ghar hamārā

ibrat kī jā hai phirnā yuuñ dar-ba-dar hamārā

koī nahīñ hai aisā dukhiyā kī jo duā le

bekas yatīm bachche ko kyoñ koī sañbhāle

kis ko ġharaz hai aisī jo god meñ uThā le

hai kaun tum meñ aisā chhātī se jo lagā le

muñh tak rahā hai sab kā laḳht-e-jigar hamārā

dil se duā hai daatā de is se bhī ziyāda

ḳhairāt jān-o-tan kī bachchoñ kā apne sadqa

ham ko bhī ho ināyat roTī kā ek TukḌā

tan Dhāñkne kī ḳhātir kapḌā koī purānā

dekho bilak rahā hai nūr-e-nazar hamārā

ham bhiik māñgne ko aa.e tumhāre aage

ibrat ke haiñ karishme ibrat ke haiñ tamāshe

qurbān jān-o-dil se vaarī tumhāre sadqe

ai bhā.iyo haiñ āḳhir ham bhī ḳhudā ke bande

mil jaa.e kuchh hameñ bhī haq ho agar hamārā

'bāsit' hameñ yaqīñ hai ho be-qarār tum bhī

ham ġham-zadoñ ke dil se ho ġham-gusār tum bhī

ḳhasta-jigar ho tum bhī ho dil-figār tum bhī

hālat hai vo hamārī ho ashk-bār tum bhī

sun lo kabhī jo naala pichhle pahar hamārā

bewa hain nala-e-gham hai ba-asar hamara

taDpaega dilon ko dard-e-jigar hamara

sartaj uTh gaya hai aaKHir kidhar hamara

viran ho gaya hai aabaad ghar hamara

ibrat ki ja hai phirna yun dar-ba-dar hamara

koi nahin hai aisa dukhiya ki jo dua le

bekas yatim bachche ko kyon koi sanbhaale

kis ko gharaz hai aisi jo god mein uTha le

hai kaun tum mein aisa chhati se jo laga le

munh tak raha hai sab ka laKHt-e-jigar hamara

dil se dua hai data de is se bhi ziyaada

KHairaat jaan-o-tan ki bachchon ka apne sadqa

hum ko bhi ho inayat roTi ka ek TukDa

tan Dhankne ki KHatir kapDa koi purana

dekho bilak raha hai nur-e-nazar hamara

hum bhik mangne ko aae tumhaare aage

ibrat ke hain karishme ibrat ke hain tamashe

qurban jaan-o-dil se wari tumhaare sadqe

ai bhaiyo hain aaKHir hum bhi KHuda ke bande

mil jae kuchh hamein bhi haq ho agar hamara

'basit' hamein yaqin hai ho be-qarar tum bhi

hum gham-zadon ke dil se ho gham-gusar tum bhi

KHasta-jigar ho tum bhi ho dil-figar tum bhi

haalat hai wo hamari ho ashk-bar tum bhi

sun lo kabhi jo nala pichhle pahar hamara