farman-e-haq ke tabe

kyā tum ne dekhā nahīñ āThvīñ pahar

jab din par se raat khīñch lī jaatī hai

to āsmān kī mahfūz chhat par ek āḳhirī taara TimTimāne lagtā hai

qasam us Dūbte taare kī

us pahar-e-kāzib ke siine lag ke jab

merī chashm-e-tar tumhāre naam kā girya kartī hai

to mizhgān-e-kā.enāt meñ halkī sī jumbish paidā hotī hai

aur vaqt kī kokh se raushnī janm letī hai

phir din aur raat kā her-pher shurūa ho jaatā hai

aur samundaroñ meñ kashtiyāñ aur jahāz

insān ke fā.ede kī chīzeñ le kar chalne phirne lagte haiñ

aur āsmān se meñh barastā hai

jo murda zamīn ko zinda kar detā hai

aur bādal tairne lagte haiñ

chāñd suukh kar khajūr ke peḌ kī Daal ban jaatā hai

sūraj taḳht-e-falak pe baiTh ke raaj kartā hai

maut-e-saġhīra kā maza chakhne vaalī āñkheñ

hairat se khulne lagtī haiñ

aur karoḌoñ paañv rizq kī talāsh meñ nikal paḌte haiñ

aise meñ merī ufuq-tāb āñkheñ

ek baar phir

āThvīñ pahar ke

Dūbte taare ko

sochne lag jaatī haiñ khojne lag jaatī haiñ

kya tum ne dekha nahin aaThwin pahar

jab din par se raat khinch li jati hai

to aasman ki mahfuz chhat par ek aaKHiri tara TimTimane lagta hai

qasam us Dubte tare ki

us pahar-e-kazib ke sine lag ke jab

meri chashm-e-tar tumhaare nam ka girya karti hai

to mizhgan-e-kaenat mein halki si jumbish paida hoti hai

aur waqt ki kokh se raushni janm leti hai

phir din aur raat ka her-pher shurua ho jata hai

aur samundaron mein kashtiyan aur jahaz

insan ke faede ki chizen le kar chalne phirne lagte hain

aur aasman se meinh barasta hai

jo murda zamin ko zinda kar deta hai

aur baadal tairne lagte hain

chand sukh kar khajur ke peD ki Dal ban jata hai

suraj taKHt-e-falak pe baiTh ke raj karta hai

maut-e-saghira ka maza chakhne wali aankhen

hairat se khulne lagti hain

aur karoDon panw rizq ki talash mein nikal paDte hain

aise mein meri ufuq-tab aankhen

ek bar phir

aaThwin pahar ke

Dubte tare ko

sochne lag jati hain khojne lag jati hain