fasad-e-zat

darīda-pairahanī kal bhī thī aur aaj bhī hai

magar vo aur sabab thā ye aur qissa hai

ye raat aur hai vo raat aur thī jis meñ

har ek ashk meñ sārañgiyāñ sī bajtī thiiñ

ajiib lazzat-e-nazzāra thī hijāb ke saath

har ek zaḳhm mahaktā thā māhtāb ke saath

yahī hayāt-e-gurezāñ baḌī suhānī thī

na tum se rañj na apne se bad-gumānī thī

shikāyat aaj bhī tum se nahīñ ki mahrūmī

tumhāre dar se na miltī to ghar se mil jaatī

tumhārā ahd agar ustuvār hī hotā

to phir bhī dāman-e-dil taar taar hī hotā

ḳhud apnī zaat hī nāḳhun ḳhud apnī zaat hī zaḳhm

ḳhud apnā dil rag-e-jāñ aur ḳhud apnā dil nashtar

fasād-e-ḳhalq bhī ḳhud aur fasād-e-zāt bhī ḳhud

safar kā vaqt bhī ḳhud jañgaloñ kī raat bhī ḳhud

tumhārī sañg-dilī se ḳhafā nahīñ hote

ki ham se apne hī va.ade vafā nahīñ hote

darida-pairahani kal bhi thi aur aaj bhi hai

magar wo aur sabab tha ye aur qissa hai

ye raat aur hai wo raat aur thi jis mein

har ek ashk mein sarangiyan si bajti thin

ajib lazzat-e-nazzara thi hijab ke sath

har ek zaKHm mahakta tha mahtab ke sath

yahi hayat-e-gurezan baDi suhani thi

na tum se ranj na apne se bad-gumani thi

shikayat aaj bhi tum se nahin ki mahrumi

tumhaare dar se na milti to ghar se mil jati

tumhaara ahd agar ustuwar hi hota

to phir bhi daman-e-dil tar tar hi hota

KHud apni zat hi naKHun KHud apni zat hi zaKHm

KHud apna dil rag-e-jaan aur KHud apna dil nashtar

fasad-e-KHalq bhi KHud aur fasad-e-zat bhi KHud

safar ka waqt bhi KHud jangalon ki raat bhi KHud

tumhaari sang-dili se KHafa nahin hote

ki hum se apne hi wade wafa nahin hote