fasil-e-zat

maiñ kis manzil pe aa pahuñchā

yahāñ to chāñdnī oḌhe hue

rastoñ kā sannāTā

bahut hī duur tak phailā huā hai

magar maiñ zaat ke gahre qafas meñ

na jaane kab se qaidī huuñ ḳhud apnā

mire hāthoñ pe ye jo rīsmāñ hai

girah meñ is kī āzādī ke panchhī phaḌ.phaḌāte the

magar vo bhī hue be-dam

qafas ke dar pe be-masraf ḳhirad ne

kar liyā qabza

har ik dīvār hadd-e-āsmāñ ma.alūm hotī hai

bahut ūñchī fasīl-e-zāt hai aur shor-e-girya hai

maiñ is se bhaag kar jā.ūñ kahāñ par

yahāñ to chāñdnī oḌhe hue rastoñ kā sannāTā

fasīl-e-zāt ko dhamkā rahā hai

kahīñ rauzan na ho dīvār-o-dar meñ

ye shor-o-ġhul kahīñ bāhar na jaa.e

main kis manzil pe aa pahuncha

yahan to chandni oDhe hue

raston ka sannaTa

bahut hi dur tak phaila hua hai

magar main zat ke gahre qafas mein

na jaane kab se qaidi hun KHud apna

mere hathon pe ye jo risman hai

girah mein is ki aazadi ke panchhi phaDphaDate the

magar wo bhi hue be-dam

qafas ke dar pe be-masraf KHirad ne

kar liya qabza

har ek diwar hadd-e-asman malum hoti hai

bahut unchi fasil-e-zat hai aur shor-e-girya hai

main is se bhag kar jaun kahan par

yahan to chandni oDhe hue raston ka sannaTa

fasil-e-zat ko dhamka raha hai

kahin rauzan na ho diwar-o-dar mein

ye shor-o-ghul kahin bahar na jae