fasl

suno maiñ ne sunā hai

ye zamīñ sonā ugaltī hai

bahut zarḳhez hai jis chiiz ke bhī biij Dāleñ

fasl us kī chand din meñ lahlahātī hai

to phir ik kaam karte haiñ

mujhe tum is zamīñ ke kuchh murabbe do

maiñ is meñ haath bo.ūñgī

mujhe hairat se mat dekho

suno jab maiñ zamīñ meñ haath bo.ūñgī

to is meñ anginat hāthoñ kī fasleñ

lahlahā.eñgī

phir un hāthoñ meñ ham ik ik qalam de kar

kaheñge

vo hamāre karb ko jāneñ hamāre ḳhauf ko likkheñ

vo ik Dar jo hameñ jiine nahīñ detā

lahū ko munjamid kar ke samundar biich

tanhā chhoḌ detā hai

jo ummīdoñ kī gāgar toḌ detā hai

un hāthoñ se kaheñge

vo hamāre dard ko likkheñ

batā deñ saarī duniyā ko

hamāre ḳhvāb be-ta.abīr haiñ

saarī duā.eñ āsmāñ kī samt taktī haiñ

hamāre ghar ke chūlhe sard haiñ

bachchoñ ke chehre zard haiñ

jiinā hai ik aisī sazā-e-bā-mashaqqat

jis ke chaudah saal puure hī nahīñ hote

suno main ne suna hai

ye zamin sona ugalti hai

bahut zarKHez hai jis chiz ke bhi bij Dalen

fasl us ki chand din mein lahlahati hai

to phir ek kaam karte hain

mujhe tum is zamin ke kuchh murabbe do

main is mein hath boungi

mujhe hairat se mat dekho

suno jab main zamin mein hath boungi

to is mein anginat hathon ki faslen

lahlahaengi

phir un hathon mein hum ek ek qalam de kar

kahenge

wo hamare karb ko jaanen hamare KHauf ko likkhen

wo ek Dar jo hamein jine nahin deta

lahu ko munjamid kar ke samundar bich

tanha chhoD deta hai

jo ummidon ki gagar toD deta hai

un hathon se kahenge

wo hamare dard ko likkhen

bata den sari duniya ko

hamare KHwab be-tabir hain

sari duaen aasman ki samt takti hain

hamare ghar ke chulhe sard hain

bachchon ke chehre zard hain

jina hai ek aisi saza-e-ba-mashaqqat

jis ke chaudah sal pure hi nahin hote