fata-kallamu tarafu

tabīb bhinbhinā gayā

maiñ sab ilaaj kar ke thak gayā huuñ

par ye bachcha boltā nahīñ

zabān is kī tandurust hai

kahīñ bhī koī raḳhna, koī naqs, maiñ nahīñ samajh sakā

badan bhī tandurust hai magar ye naunihāl chaar saal kā

ishāroñ se hī baat karnā jāntā hai, kyā karūñ?

ise kisī specialist ke paas le ke jā.iye

ye maiñ thā chaar saal kaa!

mirī zabān band thī

kalām mujh se jaise chhin gayā thā pahle din se hī

jo do baras kā mujh se chhoTā bhaa.ī thā vo ḳhuub boltā thaa, par

na jaane kaise merī jiibh guñg thī

maiñ summun bukmum thaa, be-zabān, dam-ba-ḳhud

ki jaise chup kā roza rakh ke jī chukā thā chaar saal kī ye umr-e-muḳhtasar

ajiib mo.ajaza huā ki ek din

maiñ apne ghar kī DevḌhī meñ summun bukmum khaḌā huā

tamāsha dekhtā thā ik julūs kā

alam uThā.e jis meñ log ''yā husain'' ''yā husain'' kahte

siina pīTte, lahū-luhān jā rahe the

aur maiñ jise zabān-āvarī kā kuchh pata na thā

na jaane kaise is sukūt ke añdhere ġhaar se nikal ke bol uThā

''husain! yā husain! yā husain!!''

aur phir mirā sukūt

nutq meñ, kalām meñ, suḳhan meñ Dhal gayā

maiñ saaf bolne lagā

tabib bhinbhina gaya

main sab ilaj kar ke thak gaya hun

par ye bachcha bolta nahin

zaban is ki tandurust hai

kahin bhi koi raKHna, koi naqs, main nahin samajh saka

badan bhi tandurust hai magar ye naunihaal chaar sal ka

ishaaron se hi baat karna jaanta hai, kya karun?

ise kisi specialist ke pas le ke jaiye

ye main tha chaar sal ka!

meri zaban band thi

kalam mujh se jaise chhin gaya tha pahle din se hi

jo do baras ka mujh se chhoTa bhai tha wo KHub bolta tha, par

na jaane kaise meri jibh gung thi

main summun bukmum tha, be-zaban, dam-ba-KHud

ki jaise chup ka roza rakh ke ji chuka tha chaar sal ki ye umr-e-muKHtasar

ajib moajaza hua ki ek din

main apne ghar ki DewDhi mein summun bukmum khaDa hua

tamasha dekhta tha ek julus ka

alam uThae jis mein log ya husain ya husain kahte

sina piTte, lahu-luhan ja rahe the

aur main jise zaban-awari ka kuchh pata na tha

na jaane kaise is sukut ke andhere ghaar se nikal ke bol uTha

husain! ya husain! ya husain!!

aur phir mera sukut

nutq mein, kalam mein, suKHan mein Dhal gaya

main saf bolne laga