walid

abbā tum mujh ko yaad aate ho

tum mujhe har ghaḌī rulāte ho

tum ga.e ho akelā kar ke mujhe

kar diyā zinda tum ne mar ke mujhe

bāñhoñ vaalī vo khatiyā ḳhālī hai

raat kyā zindagī hī kaalī hai

zindagī ḳhālī ḳhālī lagtī hai

bas yahī soch dil meñ paltī hai

sirf tanhā.ī dekhtā huuñ ab

jaane kyā kyā maiñ sochtā huuñ ab

kaun ab hausla baḌhā.egā

kaun ab piiTh thapthapā-e-gā

kaun ab sar pe haath rakkhegā

mere baare meñ kaun sochegā

kaun degā dilāsa duniyā meñ

ab rahūñgā maiñ pyāsā duniyā meñ

kaun DāñTegā ġhalatī karne par

kaun Tokegā ab mujhe yaaro

bin tumhāre to suunā sab ghar hai

dil meñ har vaqt ik nayā Dar hai

kaun bolegā khānā khā beTā

kaun pūchhegā tū kahāñ par hai

kaun ab pyaar se pukāregā

kaun ab zindagī sañvāregā

kis ke nazdīk ab maiñ baiThūñgā

dil kī bāteñ maiñ kis se bolūñgā

tum se har baat maiñ share kartā

tum the to maiñ kabhī nahīñ Dartā

ab maiñ kaise rahūñ be-ḳhauf-o-ḳhatar

sāmne lākhoñ dukh khaḌe haiñ satar

bas yahī fikr khā rahī hai mujhe

aap kī yaad aa rahī hai mujhe

zindagī kis qadar akelī hai

koī uljhī huī pahelī hai

tum ne ye zindagānī dī hai mujhe

koī apnī kahānī dī hai mujhe

har kahānī ko ḳhatm honā hai

zindagānī ko ḳhatm honā hai

haañ magar is se pahle kyā hogā

sochtā huuñ ki jaane kyā hogā

koī apnā na thā tumhāre sivā

mere dukh dard kī tumhīñ the davā

jab mujhe koī ġham satātā thā

tum ko har baat maiñ batātā thā

tum mujhe pyaar se biThāte the

aur dhīre se muskurāte the

phir maiñ har ġham ko bhuul jaatā thā

aur phir maiñ bhī muskurātā thā

abbā ab meñ akelā kaise jiyūñ

itne dukh dard ġham maiñ kaise sahūñ

merī himmat the hausla the tum

zinda rahne kā aasrā the tum

merī himmat bhī hausla bhī gayā

zinda rahne kā aasrā bhī gayā

ab faqat āh-o-zārī hai dil meñ

ik na.ī jañg jaarī hai dil meñ

dhaḌkaneñ tham ke ab dhaḌaktī haiñ

sāñseñ har vaqt ab phaḌaktī haiñ

aap ke chehre kī ziyārat ho

phir mujhe āñkhoñ se mohabbat ho

aap kā chehra kho gayā hai kahāñ

dhuñdhlā dhuñdhlā huā hai merā jahāñ

tum ne is pyaar se navāzā thā

pyaar vo koī de nahīñ saktā

tum ne maañ kī kamī na hone dī

zindagī meñ namī na hone dī

ham-nafas tum the tum hī dil-bar the

ham-safar tum the tum hī rahbar the

kaun ab sīdhī rah dikhā.egā

kaun ab rāste banā.egā

kaun ab pyaar se khilā.egā

kaun āġhosh meñ sulā.egā

ab mirā haath kaun thāmegā

kaun ab merā bojh uThā.egā

jab se duniyā se tum ga.e abbā

mere sukh chain kho ga.e abbā

tanhā tanhā huuñ be-sahārā huuñ

koī bujhtā huā sitārā huuñ

mujh pe ġham kā pahāḌ TuuTā hai

aap kā saath jab se chhūTā hai

beach dariyā meñ chhoḌ dī kashtī

itnī jaldī batāo kyoñ kar dī

ye bhī sochā nahīñ ki kyā hogā

aap kā beTā Dūbtā hogā

is ko ab kaun paar lā.egā

ab vo dariyā meñ ġhote khā.egā

nā-ḳhudā tum the tum masīhā the

tum hī māñjhī the tum hī nayyā the

baat ek aur hai jo karnī hai

zindagī is tarah guzarnī hai

jaise paanī binā koī machhlī

ḳhuub taḌpī bahut bahut phaḌkī

aur taḌapte hue phaḌakte hue

bas yahī kah ga.ī vo marte hue

bin sahāre koī nahīñ jiitā

chāhe vo sher ho yā ho chītā

merā har ik sahārā kho hī gayā

phuuT kar aaj maiñ bhī ro hī gayā

pahle ammī ga.iiñ ab abbā ga.e

haa.e ab maiñ yatīm ho hī gayā

abba tum mujh ko yaad aate ho

tum mujhe har ghaDi rulate ho

tum gae ho akela kar ke mujhe

kar diya zinda tum ne mar ke mujhe

banhon wali wo khatiya KHali hai

raat kya zindagi hi kali hai

zindagi KHali KHali lagti hai

bas yahi soch dil mein palti hai

sirf tanhai dekhta hun ab

jaane kya kya main sochta hun ab

kaun ab hausla baDhaega

kaun ab piTh thapthapa-e-ga

kaun ab sar pe hath rakkhega

mere bare mein kaun sochega

kaun dega dilasa duniya mein

ab rahunga main pyasa duniya mein

kaun DanTega ghalati karne par

kaun Tokega ab mujhe yaro

bin tumhaare to suna sab ghar hai

dil mein har waqt ek naya Dar hai

kaun bolega khana kha beTa

kaun puchhega tu kahan par hai

kaun ab pyar se pukarega

kaun ab zindagi sanwarega

kis ke nazdik ab main baiThunga

dil ki baaten main kis se bolunga

tum se har baat main share karta

tum the to main kabhi nahin Darta

ab main kaise rahun be-KHauf-o-KHatar

samne lakhon dukh khaDe hain satar

bas yahi fikr kha rahi hai mujhe

aap ki yaad aa rahi hai mujhe

zindagi kis qadar akeli hai

koi uljhi hui paheli hai

tum ne ye zindagani di hai mujhe

koi apni kahani di hai mujhe

har kahani ko KHatm hona hai

zindagani ko KHatm hona hai

han magar is se pahle kya hoga

sochta hun ki jaane kya hoga

koi apna na tha tumhaare siwa

mere dukh dard ki tumhin the dawa

jab mujhe koi gham satata tha

tum ko har baat main batata tha

tum mujhe pyar se biThate the

aur dhire se muskuraate the

phir main har gham ko bhul jata tha

aur phir main bhi muskuraata tha

abba ab mein akela kaise jiyun

itne dukh dard gham main kaise sahun

meri himmat the hausla the tum

zinda rahne ka aasra the tum

meri himmat bhi hausla bhi gaya

zinda rahne ka aasra bhi gaya

ab faqat aah-o-zari hai dil mein

ek nai jang jari hai dil mein

dhaDkanen tham ke ab dhaDakti hain

sansen har waqt ab phaDakti hain

aap ke chehre ki ziyarat ho

phir mujhe aankhon se mohabbat ho

aap ka chehra kho gaya hai kahan

dhundhla dhundhla hua hai mera jahan

tum ne is pyar se nawaza tha

pyar wo koi de nahin sakta

tum ne man ki kami na hone di

zindagi mein nami na hone di

ham-nafas tum the tum hi dil-bar the

ham-safar tum the tum hi rahbar the

kaun ab sidhi rah dikhaega

kaun ab raste banaega

kaun ab pyar se khilaega

kaun aaghosh mein sulaega

ab mera hath kaun thamega

kaun ab mera bojh uThaega

jab se duniya se tum gae abba

mere sukh chain kho gae abba

tanha tanha hun be-sahaara hun

koi bujhta hua sitara hun

mujh pe gham ka pahaD TuTa hai

aap ka sath jab se chhuTa hai

beach dariya mein chhoD di kashti

itni jaldi batao kyon kar di

ye bhi socha nahin ki kya hoga

aap ka beTa Dubta hoga

is ko ab kaun par laega

ab wo dariya mein ghote khaega

na-KHuda tum the tum masiha the

tum hi manjhi the tum hi nayya the

baat ek aur hai jo karni hai

zindagi is tarah guzarni hai

jaise pani bina koi machhli

KHub taDpi bahut bahut phaDki

aur taDapte hue phaDakte hue

bas yahi kah gai wo marte hue

bin sahaare koi nahin jita

chahe wo sher ho ya ho chita

mera har ek sahaara kho hi gaya

phuT kar aaj main bhi ro hi gaya

pahle ammi gain ab abba gae

hae ab main yatim ho hi gaya