walid ki yaad mein

sahar ke saath vo ḳhāmosh ho chukā hai magar

sharāb-e-nūr musalsal pilā rahā hai mujhe

mirī nigāhoñ se rū-posh ho chukā hai magar

qadam qadam pe vo sūrat dikhā rahā hai mujhe

makān meñ nazar aatā nahīñ kahīñ bhī magar

maiñ us ko DhūñDūñ to be-intihā mohabbat se

mujhe vo dauḌ kar apne gale lagātā hai

palang us kā hai kHālī magar usī par vo

maiñ ro paḌūñ to mujhe pyaar se biThātā hai

maiñ ġham kī dhuup meñ jalne lagūñ to rah rah kar

mirī jabīñ pe vo shafqat se haath rakhtā hai

vo mere paas mire saath har ghaḌī hai magar

jo log qabr meñ us ko utaar aa.e haiñ

haiñ sogvār dilā.ūñ unheñ yaqīñ kyūñkar

marā nahīñ hai mirā baap ab bhī zinda hai

sahar ke sath wo KHamosh ho chuka hai magar

sharab-e-nur musalsal pila raha hai mujhe

meri nigahon se ru-posh ho chuka hai magar

qadam qadam pe wo surat dikha raha hai mujhe

makan mein nazar aata nahin kahin bhi magar

main us ko DhunDun to be-intiha mohabbat se

mujhe wo dauD kar apne gale lagata hai

palang us ka hai kHali magar usi par wo

main ro paDun to mujhe pyar se biThata hai

main gham ki dhup mein jalne lagun to rah rah kar

meri jabin pe wo shafqat se hath rakhta hai

wo mere pas mere sath har ghaDi hai magar

jo log qabr mein us ko utar aae hain

hain sogwar dilaun unhen yaqin kyunkar

mara nahin hai mera bap ab bhi zinda hai