ek buDha

ik būḌhā bistar-e-marg pe hai

bīmār badan lāchār badan

sāñseñ bhī kuchh bojhal sī haiñ

aur āñkheñ bhī jal-thal sī haiñ

aisā bhī nahīñ tanhā hai vo

paanī hai magar pyāsā hai vo

ghar meñ bahūveñ beTe bhī haiñ

haiñ potiyāñ bhī pote bhī haiñ

lekin koī paas nahīñ aatā

sab jhāñkte haiñ chale jaate haiñ

jaise ye is kā ghar hī nahīñ

jaise vo sab begāne haiñ

jis bahū kā number hotā hai

khāne ke nivāle Thūñs ke vo

farz apnā mukammal kartī hai

phir vaqt pe koī ik beTā

vo jis ko thoḌī fursat ho

pahle to aa kar DāñTtā hai

detā hai davā.ī phir aise

jaise ehsān kare koī

jaise apmān kare koī

har din ye būḌhā sochtā hai

koī baat na.ī ho aaj ke din

koī do mīThe alfāz kahe

kabhī mahfil us ke paas saje

kabhī hañsne kī koī baat chale

magar aisā pichhle barsoñ meñ

kabhī ho paayā nahīñ ho paayā

apne us begāne-pan par

apne us vīrāne-pan par

ye būḌhā inkishāf rahtā hai

ye būḌhā rotā rahtā hai

ik būḌhā bistar-e-marg pe hai

ek buDha bistar-e-marg pe hai

bimar badan lachaar badan

sansen bhi kuchh bojhal si hain

aur aankhen bhi jal-thal si hain

aisa bhi nahin tanha hai wo

pani hai magar pyasa hai wo

ghar mein bahuwen beTe bhi hain

hain potiyan bhi pote bhi hain

lekin koi pas nahin aata

sab jhankte hain chale jate hain

jaise ye is ka ghar hi nahin

jaise wo sab begane hain

jis bahu ka number hota hai

khane ke niwale Thuns ke wo

farz apna mukammal karti hai

phir waqt pe koi ek beTa

wo jis ko thoDi fursat ho

pahle to aa kar DanTta hai

deta hai dawai phir aise

jaise ehsan kare koi

jaise apman kare koi

har din ye buDha sochta hai

koi baat nai ho aaj ke din

koi do miThe alfaz kahe

kabhi mahfil us ke pas saje

kabhi hansne ki koi baat chale

magar aisa pichhle barson mein

kabhi ho paya nahin ho paya

apne us begane-pan par

apne us virane-pan par

ye buDha inkishaf rahta hai

ye buDha rota rahta hai

ek buDha bistar-e-marg pe hai