fauj-e-sulaimani

mire jab ek bachcha thā to thī ye aish-sāmānī

kabhī murġh-e-musallam thā kabhī paktī thī biryānī

na kuchh begam kā mujh se kam thā zauq-e-jalva-sāmānī

agar maiñ din kā raaja thā to vo thī raat kī raanī

na aatā thā kabhī dil meñ ḳhayāl zoja-e-sānī

ki maiñ biivī kā dīvāna thā biivī merī dīvānī

kamī koī na thī ai dost har shai kī thī arzānī

kuchh english maal thā ghar meñ to kuchh sāmān jāpānī

sirhāne radio rakkhā huā rahtā thā jāpānī

latā mangeshkar kī roz suntā thā ġhazal-ḳhvānī

ik arse tak to guzrī zindagī yuuñ hī bā-āsānī

na do bachchoñ tak aa.ī bhuul kar ghar meñ pareshānī

huā haañ tīsrā bachcha to do item bā-āsānī

hue ġhā.eb na phir murġhā rahā baaqī na biryānī

magar ye zindagī phir bhī mirī ġham se thī anjānī

ki thī tanḳhvāh kaafī kaam chaltā thā bā-āsānī

chalā jab silsila bachchoñ kī paidā.ish kā tūlānī

to ġhurbat meñ badal kar rah ga.ī sab aish-sāmānī

vo mujh par āThveñ bachche ke baad aa.ī pareshānī

ki yāroñ tak ne pahchānī huī sūrat na pahchānī

vahī biivī ki jis ko saas kahtī thī bahū raanī

vahī biivī hai ab in be-tuke bachchoñ kī mullānī

bikā zevar huī qurqī ġharaz har shai huī faanī

jidhar dekho udhar ghar meñ hai ik fauj-e-sulaimānī

azīz-o-aqrabā ko dekh kar hai mujh ko hairānī

kisī ne bhī na ġhurbat meñ mirī kī ashk-afshānī

kahā us ne yahī jis ne sunā hāl-e-pareshānī

charā kaare kunad aaqil ki baaz aayad pashemānī

mere jab ek bachcha tha to thi ye aish-samani

kabhi murgh-e-musallam tha kabhi pakti thi biryani

na kuchh begam ka mujh se kam tha zauq-e-jalwa-samani

agar main din ka raja tha to wo thi raat ki rani

na aata tha kabhi dil mein KHayal zoja-e-sani

ki main biwi ka diwana tha biwi meri diwani

kami koi na thi ai dost har shai ki thi arzani

kuchh english mal tha ghar mein to kuchh saman japani

sirhane radio rakkha hua rahta tha japani

lata mangeshkar ki roz sunta tha ghazal-KHwani

ek arse tak to guzri zindagi yun hi ba-asani

na do bachchon tak aai bhul kar ghar mein pareshani

hua han tisra bachcha to do item ba-asani

hue ghaeb na phir murgha raha baqi na biryani

magar ye zindagi phir bhi meri gham se thi anjaani

ki thi tanKHwah kafi kaam chalta tha ba-asani

chala jab silsila bachchon ki paidaish ka tulani

to ghurbat mein badal kar rah gai sab aish-samani

wo mujh par aaThwen bachche ke baad aai pareshani

ki yaron tak ne pahchani hui surat na pahchani

wahi biwi ki jis ko sas kahti thi bahu rani

wahi biwi hai ab in be-tuke bachchon ki mullani

bika zewar hui qurqi gharaz har shai hui fani

jidhar dekho udhar ghar mein hai ek fauj-e-sulaimani

aziz-o-aqraba ko dekh kar hai mujh ko hairani

kisi ne bhi na ghurbat mein meri ki ashk-afshani

kaha us ne yahi jis ne suna haal-e-pareshani

chara kare kunad aaqil ki baz aayad pashemani