faza-e-hairat

sahar kī kaliyāñ luTī huī haiñ

guloñ kī shāḳheñ jhukī huī haiñ

hasīn tālāb ke kināre

hasīn pariyāñ khaḌī huī haiñ

ba-zer-e-shāḳh-e-gul-e-shagufta maiñ sūrat-e-sham.a chup khaḌī huuñ

fazā meñ koyal kī ik sadā hai

tamām jangal laraz rahā hai

hasīn duniyā kī rahne vaalī

hasīñ fazāoñ meñ naġhma-zā hai

maiñ misl ik ġhuncha-e-fasurda navā-e-tasvīr ban rahī huuñ

ye kaun manzar hai pesh-e-duniyā

ye kaisī duniyā hai husn-ārā

ye kyā tamāshā sā ho rahā hai

ye kaise manzar haiñ jalva-ārā

maiñ dil meñ tasvīr khīñchtī huuñ nigāh-e-hairat se dekhtī huuñ

ye kyā hai ai merī chashm-e-hairāñ

hai kyā tamāshā ruḳh-e-gulistāñ

maiñ kyā karūñ is musavvirī ko

mujhe hai uljhan mujhe hai ḳhaljān

idhar udhar ko jo dekhtī huuñ hasīn taa.ir haiñ zamzama-zā

vo un kā gaanā ba-sad-masarrat

ye kyoñ navā hai navā-e-ishrat

ye un ke naġhme rabāb-e-jannat

haiñ sūrat-e-sham.a mahv-e-hairat

ilāhī is musht-e-par meñ chhup kar adā se ye kaun gā rahā hai

ki dil pe choTeñ lagā rahā hai

jigar meñ Tīseñ uThā rahā hai

fazā meñ naġhme luTā rahā hai

mujhe pareshāñ banā rahā hai

yeh misl-e-dīvār chup khaḌī hoñ ye kaun gaatā hai is adā se

fazā meñ naġhmoñ kī ye nazākat

ye phuul chun kar huuñ mahv-e-hairat

maiñ kyā karūñ zamzamoñ kā yā-rab

ye hai ta.ajjub ye hī hai hairat

'jamāl' hairān-o-pur-tahayyur hai husn-e-duniyā fazā-e-hairat

sahar ki kaliyan luTi hui hain

gulon ki shaKHen jhuki hui hain

hasin talab ke kinare

hasin pariyan khaDi hui hain

ba-zer-e-shaKH-e-gul-e-shagufta main surat-e-shama chup khaDi hun

faza mein koyal ki ek sada hai

tamam jangal laraz raha hai

hasin duniya ki rahne wali

hasin fazaon mein naghma-za hai

main misl ek ghuncha-e-fasurda nawa-e-taswir ban rahi hun

ye kaun manzar hai pesh-e-duniya

ye kaisi duniya hai husn-ara

ye kya tamasha sa ho raha hai

ye kaise manzar hain jalwa-ara

main dil mein taswir khinchti hun nigah-e-hairat se dekhti hun

ye kya hai ai meri chashm-e-hairan

hai kya tamasha ruKH-e-gulistan

main kya karun is musawwiri ko

mujhe hai uljhan mujhe hai KHaljaan

idhar udhar ko jo dekhti hun hasin tair hain zamzama-za

wo un ka gana ba-sad-masarrat

ye kyon nawa hai nawa-e-ishrat

ye un ke naghme rabab-e-jannat

hain surat-e-shama mahw-e-hairat

ilahi is musht-e-par mein chhup kar ada se ye kaun ga raha hai

ki dil pe choTen laga raha hai

jigar mein Tisen uTha raha hai

faza mein naghme luTa raha hai

mujhe pareshan bana raha hai

yeh misl-e-diwar chup khaDi hon ye kaun gata hai is ada se

faza mein naghmon ki ye nazakat

ye phul chun kar hun mahw-e-hairat

main kya karun zamzamon ka ya-rab

ye hai tajjub ye hi hai hairat

'jamal' hairan-o-pur-tahayyur hai husn-e-duniya faza-e-hairat