fikr-e-ainda

hameñ basārat se mahrūm kar diyā gayā hai

yā manzar se husn ġhā.eb ho gayā hai

ek lā-mutanāhī siyāh parda hai

jis se mātamī libās tayyār kiyā jā saktā hai

aur ehtajājī paTTiyāñ banā.ī jā saktī haiñ

hameñ ek sūraj darkār hai

jis se

mo.attal bahār ke phuul khilā.e jā sakeñ

jahālat ke parde meñ chhupā

ek din tulūa ho sake

oxygen ḳhatm hone se pahle

hameñ na.e daraḳht lagāne haiñ

purāne daraḳhtoñ ko

aivān-e-sadr kī ta.amīr meñ isti.māl kiyā jā saktā hai

hameñ guzishta se ziyāda

ā.inda kī fikr karnī chāhiye

isī ā.inda meñ

hamāre bachchoñ ko zinda rahnā hai

hamein basarat se mahrum kar diya gaya hai

ya manzar se husn ghaeb ho gaya hai

ek la-mutanahi siyah parda hai

jis se matami libas tayyar kiya ja sakta hai

aur ehtajaji paTTiyan banai ja sakti hain

hamein ek suraj darkar hai

jis se

moattal bahaar ke phul khilae ja saken

jahaalat ke parde mein chhupa

ek din tulua ho sake

oxygen KHatm hone se pahle

hamein nae daraKHt lagane hain

purane daraKHton ko

aiwan-e-sadr ki tamir mein istimal kiya ja sakta hai

hamein guzishta se ziyaada

aainda ki fikr karni chahiye

isi aainda mein

hamare bachchon ko zinda rahna hai