fikr-e-ashiyan

amal kuchh hai zabān-e-bāġhbāñ kuchh aur kahtī hai

na.ī āb-o-havā-e-gulistāñ kuchh aur kahtī hai

bharosa kyā kareñ ahl-e-gulistāñ lāla-o-gul par

anādil kī zabān-e-pur-bayāñ kuchh aur kahtī hai

na hotā koī Dar sayyād-o-gulchīñ kā nasheman meñ

magar ġhaflat tirī ai pāsbāñ kuchh aur kahtī hai

sunātī haiñ bahāreñ ham ko paiġhām-e-tarab lekin

bahāroñ ke pas-e-parda ḳhizāñ kuchh aur kahtī hai

sitamgar maiñ nahīñ kahtā sitamgar tum nahīñ lekin

dil-e-mazlūm kī āh-o-fuġhāñ kuchh aur kahtī hai

sañbhal kar chal na ho be-rāh-rau shauq-e-qayādat meñ

tirī azmat amīr-e-kārvāñ kuchh aur kahtī hai

vafā-nā-āshnā jo mujh ko kahte haiñ zarā socheñ

mire ahd-e-vafā kī dāstāñ kuchh aur kahtī hai

ye maanā kar rahe haiñ pāsbānī pāsbāñ lekin

chamak kar barq gird-e-āshiyāñ kuchh aur kahtī hai

chaman vaalo vafāoñ par tum apnī naaz karte ho

nigāh-e-kaj-adā-e-bāġhbāñ kuchh aur kahtī hai

vafādārī ba-shart-e-ustuvārī asl-e-īmāñ hai

magar merī zabān-e-be-zabāñ kuchh aur kahtī hai

mayassar hai hameñ āzādī-e-sair-e-chaman lekin

'razī' har vaqt fikr-e-āshiyāñ kuchh aur kahtī hai

amal kuchh hai zaban-e-baghban kuchh aur kahti hai

nai aab-o-hawa-e-gulistan kuchh aur kahti hai

bharosa kya karen ahl-e-gulistan lala-o-gul par

anadil ki zaban-e-pur-bayan kuchh aur kahti hai

na hota koi Dar sayyaad-o-gulchin ka nasheman mein

magar ghaflat teri ai pasban kuchh aur kahti hai

sunati hain bahaaren hum ko paigham-e-tarab lekin

bahaaron ke pas-e-parda KHizan kuchh aur kahti hai

sitamgar main nahin kahta sitamgar tum nahin lekin

dil-e-mazlum ki aah-o-fughan kuchh aur kahti hai

sanbhal kar chal na ho be-rah-rau shauq-e-qayaadat mein

teri azmat amir-e-karwan kuchh aur kahti hai

wafa-na-ashna jo mujh ko kahte hain zara sochen

mere ahd-e-wafa ki dastan kuchh aur kahti hai

ye mana kar rahe hain pasbani pasban lekin

chamak kar barq gird-e-ashiyan kuchh aur kahti hai

chaman walo wafaon par tum apni naz karte ho

nigah-e-kaj-ada-e-baghban kuchh aur kahti hai

wafadari ba-shart-e-ustuwari asl-e-iman hai

magar meri zaban-e-be-zaban kuchh aur kahti hai

mayassar hai hamein aazadi-e-sair-e-chaman lekin

'razi' har waqt fikr-e-ashiyan kuchh aur kahti hai