fikr ka qaidi

dinoñ haftoñ mahīnoñ sochtā huuñ

kisī jvālā-mukhī sā khaultā huuñ apne paikar kī guphāoñ meñ

phir us ke baa'd aatā hai ik aisā pal zamīñ hilne lage jaise

ubal uThtā hai laavā toḌ kar kitnī chaTāneñ

aur saarī soch ik bhīgī huī dīvār kī sūrat

achānak baiTh jaatī hai

magar jvālā-mukhī jvālā-mukhī hai

ye ḳharosh-e-nār kī tahzīb ke andāz kyā jaane

laraz jaatā huuñ ik halkī sadā par is tarah aksar

baġhal se jaise koī sansanātā tiir guzrā ho

kahāñ le jā.ūñ apne ko

sulagte falsafe halqa-ba-halqa zehn par yalġhār karte haiñ

kisī qadġhan se kab ruktā hai sho.aloñ kā ye favvāra

ki aur ik soch is andāz se phir phuuT paḌtī hai

banā jaatā huuñ apnī fikr kī zanjīr kā qaidī

dinon hafton mahinon sochta hun

kisi jwala-mukhi sa khaulta hun apne paikar ki guphaon mein

phir us ke ba'd aata hai ek aisa pal zamin hilne lage jaise

ubal uThta hai lawa toD kar kitni chaTanen

aur sari soch ek bhigi hui diwar ki surat

achanak baiTh jati hai

magar jwala-mukhi jwala-mukhi hai

ye KHarosh-e-nar ki tahzib ke andaz kya jaane

laraz jata hun ek halki sada par is tarah aksar

baghal se jaise koi sansanata tir guzra ho

kahan le jaun apne ko

sulagte falsafe halqa-ba-halqa zehn par yalghaar karte hain

kisi qadghan se kab rukta hai shoalon ka ye fawwara

ki aur ek soch is andaz se phir phuT paDti hai

bana jata hun apni fikr ki zanjir ka qaidi