fitrat-e-dushman

hai dāḳhil fitrat-e-mun.im meñ nādāroñ ko taḌpānā

sar-e-pā-e-hiqārat se har ik bekas ko Thukrānā

hai fitrat dushmanān-e-dīn-o-īmān-o-haqīqat kī

vatan se kar ke ġhaddārī mulūkiyyat se mil jaanā

diloñ meñ tuḳhm-rezī ho chukī hai jab kudūrat kī

bhalā dushvār kyā hai aise naḳhl-e-tar kā baḌh jaanā

binā-e-hurriyat kī ustuvārī kī thī jab ham ne

sar-e-'dās'-o-bhagat-singh de diye the qabl nazrāna

koī kah de hukūmat se na uljhe naujavānoñ se

inheñ sikhlā diyā hai zulm ne zālim se Takrānā

yaqīnan inqalāb-e-hind hogā ai 'suḳhan' hogā

hameñ zebā hai apne ghar meñ jhanDā surḳh lahrānā

hai daKHil fitrat-e-munim mein nadaron ko taDpana

sar-e-pa-e-hiqarat se har ek bekas ko Thukrana

hai fitrat dushmanan-e-din-o-iman-o-haqiqat ki

watan se kar ke ghaddari mulukiyyat se mil jaana

dilon mein tuKHm-rezi ho chuki hai jab kudurat ki

bhala dushwar kya hai aise naKHl-e-tar ka baDh jaana

bina-e-hurriyat ki ustuwari ki thi jab hum ne

sar-e-'das'-o-bhagat-singh de diye the qabl nazrana

koi kah de hukumat se na uljhe naujawanon se

inhen sikhla diya hai zulm ne zalim se Takrana

yaqinan inqalab-e-hind hoga ai 'suKHan' hoga

hamein zeba hai apne ghar mein jhanDa surKH lahrana