flash-back

maiñ aaj

college ke campus meñ

udaas tanhā khaḌā huā huuñ

usī jagah pe

jahāñ pe pahlī dafa tumhārī

hasīñ nazar se

nazar milī thī

to tajraba ik nayā huā thā

mirī nazar ko

ki is se pahle

ye raushnī jo

tumhāre andar se aa rahī thī

kisī meñ mujh ko nazar na aa.ī

tumhīñ thiiñ jis ne

udāsiyoñ kī shaboñ meñ merī ziyā ugaa.ī

ki ḳhushk Daalī pe mere man kī

na.ī sī koñpal nikal ke aa.ī

maiñ un dinoñ meñ

sañvar rahā thā

nikhar rahā thā

tumhārī chāhat ke abr rahmat kī tarh mujh par

baras rahe the

ki jism-o-jāñ sab mahak rahe the

tumhārī pākīzgī kā sūraj

mire badan meñ chamak rahā thā

ki sar se pā tak vujūd merā

ḳhushī ke paikar meñ Dhal chukā thā

ye ibtidā thī

us intihā kī

maiñ aaj jis tak pahuñch gayā huuñ

maiñ aaj

college ke campus meñ

udaas tanhā

khaḌā huā huuñ

main aaj

college ke campus mein

udas tanha khaDa hua hun

usi jagah pe

jahan pe pahli dafa tumhaari

hasin nazar se

nazar mili thi

to tajraba ek naya hua tha

meri nazar ko

ki is se pahle

ye raushni jo

tumhaare andar se aa rahi thi

kisi mein mujh ko nazar na aai

tumhin thin jis ne

udasiyon ki shabon mein meri ziya ugai

ki KHushk Dali pe mere man ki

nai si konpal nikal ke aai

main un dinon mein

sanwar raha tha

nikhar raha tha

tumhaari chahat ke abr rahmat ki tarh mujh par

baras rahe the

ki jism-o-jaan sab mahak rahe the

tumhaari pakizgi ka suraj

mere badan mein chamak raha tha

ki sar se pa tak wujud mera

KHushi ke paikar mein Dhal chuka tha

ye ibtida thi

us intiha ki

main aaj jis tak pahunch gaya hun

main aaj

college ke campus mein

udas tanha

khaDa hua hun