footpath ke log

shahr meñ kuchh bhī ho jaa.e

ye log kahīñ nahīñ jaate

yā shāyad ham

gharoñ meñ rahne vāloñ ko

aisā hī lagtā hai

jab sub.h sub.h hameñ kahīñ jaanā paḌtā hai

to unheñ fōtpath par

be-ḳhabarī ke aalam meñ sotā dekh kar

ham un kī zindagī ke baare meñ

sochte haiñ

magar vāpsī tak bhuul jaate haiñ

hamārī gaaḌī ko traffic-jām meñ

phañsā dekh kar

ye hañste haiñ to hameñ

apne-āp par ronā aatā hai

har roz ek hī jagah unheñ dekh ke

hameñ hairat hotī hai

tez dhuup meñ unheñ jaltā dekh kar

hameñ afsos hotā hai

unheñ bārish meñ bhīgtā dekh kar

ham ḳhuub hañste haiñ

har raat jab ye so.e hue hote haiñ

añdhere fōtpath par se

guzarte hue

ham unheñ Thokareñ mārte haiñ

aur kabhī muāfī nahīñ māñgte

shahr mein kuchh bhi ho jae

ye log kahin nahin jate

ya shayad hum

gharon mein rahne walon ko

aisa hi lagta hai

jab subh subh hamein kahin jaana paDta hai

to unhen footpath par

be-KHabari ke aalam mein sota dekh kar

hum un ki zindagi ke bare mein

sochte hain

magar wapsi tak bhul jate hain

hamari gaDi ko traffic-jam mein

phansa dekh kar

ye hanste hain to hamein

apne-ap par rona aata hai

har roz ek hi jagah unhen dekh ke

hamein hairat hoti hai

tez dhup mein unhen jalta dekh kar

hamein afsos hota hai

unhen barish mein bhigta dekh kar

hum KHub hanste hain

har raat jab ye soe hue hote hain

andhere footpath par se

guzarte hue

hum unhen Thokaren marte hain

aur kabhi muafi nahin mangte