فرقت داس

ہوک سی اٹھتی ہوئی دل میں نمایاں دیکھنا

درد و کلفت اور جگر میں زخم خنداں دیکھنا

بے بہا غم میں مجھے ہوتا پریشاں دیکھنا

میری آنکھیں اشک زار خوں میں گریاں دیکھنا

پر نہ مجھ سے پوچھنا میرے دل محزوں کا حال

ہم نشینو شاق گزرے گی یہ ورنہ قیل و قال

کیوں نہ میرے دل کی بے تابی شرر انگیز ہو

کیوں نہ دل میں موجزن طوفان محشر خیز ہو

کیوں نہ داغ دل مرا پل پل میں شعلہ ریز ہو

کیوں نہ بے چینی مرے دل کی قیامت خیز ہو

جب کہ تڑپائے مجھے فرقت جتیندر ناتھ کی

جب کہ تڑپائے مجھے ہجرت جتیندر ناتھ کی

چل گئی ہے قاتل سفاک کی گو تجھ پہ گھات

ہے مگر اے داس تیری موت یاد کائنات

جس کے ہر اسرار میں پنہاں ہے اک راز حیات

دور آزادی کی جس میں ہیں ہزاروں کیفیات

تیرے طرز فعل سے ہے بے نقاب حریت

ہر طرف جلوہ فگن ہے آفتاب حریت

تیری قربانی میں مضمر ہے حیات جاوداں

جس نے بھر دیں عزم و ہمت کی دلوں میں بجلیاں

بڑھ گیا شوق شہادت بڑھ گئیں بیتابیاں

اور آزادی کی لہرائیں گے ہر سو جھنڈیاں

تختۂ ہندوستاں پر انقلاب آنے کو ہے

اس گلستان بریدہ میں شباب آنے کو ہے