furqat-e-das

huuk sī uThtī huī dil meñ numāyāñ dekhnā

dard-o-kulfat aur jigar meñ zaḳhm-e-ḳhandāñ dekhnā

be-bahā ġham meñ mujhe hotā pareshāñ dekhnā

merī āñkheñ ashk-zār-e-ḳhūñ meñ giryāñ dekhnā

par na mujh se pūchhnā mere dil-e-mahzūñ kā haal

ham-nashīno shaaq guzregī ye varna qīl-o-qāl

kyoñ na mere dil kī be-tābī sharar-angez ho

kyoñ na dil meñ maujzan tūfān mahshar-ḳhez ho

kyoñ na dāġh-e-dil mirā pal-pal meñ sho.ala-rez ho

kyoñ na bechainī mire dil kī qayāmat-ḳhez ho

jab ki taḌpā.e mujhe furqat jitendr naath kī

jab ki taḌpā.e mujhe hijrat jitendr naath kī

chal ga.ī hai qātil-e-saffāk kī go tujh pe ghaat

hai magar ai daas terī maut yād-e-kā.enāt

jis ke har asrār meñ pinhāñ hai ik rāz-e-hayāt

daūr-e-āzādī kī jis meñ haiñ hazāroñ kaifiyāt

tere tarz-e-fe.al se hai be-naqāb-e-hurriyat

har taraf jalva-fagan hai āftāb-e-hurriyat

terī qurbānī meñ muzmar hai hayāt-e-jāvidāñ

jis ne bhar diiñ azm-o-himmat kī diloñ meñ bijliyāñ

baḌh gayā shauq-e-shahādat baḌh ga.iiñ betābiyāñ

aur āzādī kī lahrā.eñge har-sū jhanDiyāñ

taḳhta-e-hindostāñ par inqilāb aane ko hai

is gulistān-e-burīda meñ shabāb aane ko hai

huk si uThti hui dil mein numayan dekhna

dard-o-kulfat aur jigar mein zaKHm-e-KHandan dekhna

be-baha gham mein mujhe hota pareshan dekhna

meri aankhen ashk-zar-e-KHun mein giryan dekhna

par na mujh se puchhna mere dil-e-mahzun ka haal

ham-nashino shaq guzregi ye warna qil-o-qal

kyon na mere dil ki be-tabi sharar-angez ho

kyon na dil mein maujzan tufan mahshar-KHez ho

kyon na dagh-e-dil mera pal-pal mein shoala-rez ho

kyon na bechaini mere dil ki qayamat-KHez ho

jab ki taDpae mujhe furqat jitendr nath ki

jab ki taDpae mujhe hijrat jitendr nath ki

chal gai hai qatil-e-saffak ki go tujh pe ghat

hai magar ai das teri maut yaad-e-kaenat

jis ke har asrar mein pinhan hai ek raaz-e-hayat

daur-e-azadi ki jis mein hain hazaron kaifiyat

tere tarz-e-feal se hai be-naqab-e-hurriyat

har taraf jalwa-fagan hai aaftab-e-hurriyat

teri qurbani mein muzmar hai hayat-e-jawidan

jis ne bhar din azm-o-himmat ki dilon mein bijliyan

baDh gaya shauq-e-shahadat baDh gain betabiyan

aur aazadi ki lahraenge har-su jhanDiyan

taKHta-e-hindostan par inqilab aane ko hai

is gulistan-e-burida mein shabab aane ko hai