furqat

o furqat kyā tū bhī balā ho

tuul meñ terī gar na maza ho

sab se apne jī ko uThā.e

jis kī dhun meñ aas lagā.e

saare masā.ib jhel rahā huuñ

jaan par apnī khel rahā huuñ

dil meñ us kī yaad tujhī se

ḳhāna-e-dil ābād tujhī se

saarī ḳhūbī saarī achchhā.ī

us meñ tū ne mujh ko dikhā.ī

barq se us meñ tezī ġhālib

us meñ hiran se shoḳhī ġhālib

gul se nāz-o-nazākat zaa.id

chāñd se us meñ shaukat zaa.id

qāmat us kī sarv se behtar

kabk-e-darī se chaal subuk-tar

qahr hai us kī chashm-e-pur-fan

zulf hai us kī kaalī nāgan

sabze jo haiñ havā meñ hilte

abr jo haiñ aapas meñ milte

is meñ vaisī sharārat kab hai

is meñ aisī rif'at kab hai

gul buuTe go sab meñ nirāle

kab haiñ vaise bhole-bhāle

bād-e-subuk meñ naaz kahāñ hai

ġhunchoñ meñ āvāz kahāñ hai

dil meñ aanā kaam hai kis kā

aisā pyārā naam hai kis kā

bāġh-e-jahāñ kā saarā manzar

husn meñ kab hai us ke barābar

ye nazzāra tū ne dikhāyā

tū ne maḳhfī bhed batāyā

dil ko umīdoñ kā ik daftar

aur zabāñ ko us kā sanā-gar

kis ne banāyā tū ne banāyā

saarā karishma tū ne dikhāyā

ġham-zadagī kī ḳhasta-dilī kī

tū ne kuchh fariyād-rasī kī

tujh par jaañ qurbān hamārī

tū ne rakh lī jaan hamārī

o furqat kya tu bhi bala ho

tul mein teri gar na maza ho

sab se apne ji ko uThae

jis ki dhun mein aas lagae

sare masaib jhel raha hun

jaan par apni khel raha hun

dil mein us ki yaad tujhi se

KHana-e-dil aabaad tujhi se

sari KHubi sari achchhai

us mein tu ne mujh ko dikhai

barq se us mein tezi ghaalib

us mein hiran se shoKHi ghaalib

gul se naz-o-nazakat zaid

chand se us mein shaukat zaid

qamat us ki sarw se behtar

kabk-e-dari se chaal subuk-tar

qahr hai us ki chashm-e-pur-fan

zulf hai us ki kali nagan

sabze jo hain hawa mein hilte

abr jo hain aapas mein milte

is mein waisi shararat kab hai

is mein aisi rif'at kab hai

gul buTe go sab mein nirale

kab hain waise bhole-bhaale

baad-e-subuk mein naz kahan hai

ghunchon mein aawaz kahan hai

dil mein aana kaam hai kis ka

aisa pyara nam hai kis ka

bagh-e-jahan ka sara manzar

husn mein kab hai us ke barabar

ye nazzara tu ne dikhaya

tu ne maKHfi bhed bataya

dil ko umidon ka ek daftar

aur zaban ko us ka sana-gar

kis ne banaya tu ne banaya

sara karishma tu ne dikhaya

gham-zadagi ki KHasta-dili ki

tu ne kuchh fariyaad-rasi ki

tujh par jaan qurban hamari

tu ne rakh li jaan hamari