fusun TuTta hai

ye tajrīdī ḳhākoñ kī tasvīr-gah hai

mirā muñh chiḌāne ko dīvār-o-dar par ka.ī masḳh paikar Tañge haiñ

mujhe ghūrte haiñ Darāte haiñ mujh ko

maiñ un sīdhī-ulTī lakīroñ ke dām-e-riyā meñ ulajh gayā huuñ

bil-āḳhir fusūn-e-riyā TūTtā hai

nigah ek tasvīr ke chaukhaTe par lagī chiT par aa kar rukī hai

vahāñ us kī qīmat likhī hai

jise dekh kar maiñ phir us paikar-e-masḳh ko dekhtā huuñ

jahāñ ik bhayānak dahan hai

jo bad-rañg māthe par phailā huā hai

sadā aa rahī hai

ye bāzār hai misr kā

is meñ me.aar kī koī qīmat nahīñ hai

yahāñ ek anTī pe yūsuf se paiġhāmbar bik chuke haiñ

yahāñ balki qīmat hī me.aar Thahre

ye tajridi KHakon ki taswir-gah hai

mera munh chiDane ko diwar-o-dar par kai masKH paikar Tange hain

mujhe ghurte hain Daraate hain mujh ko

main un sidhi-ulTi lakiron ke dam-e-riya mein ulajh gaya hun

bil-aKHir fusun-e-riya TuTta hai

nigah ek taswir ke chaukhaTe par lagi chiT par aa kar ruki hai

wahan us ki qimat likhi hai

jise dekh kar main phir us paikar-e-masKH ko dekhta hun

jahan ek bhayanak dahan hai

jo bad-rang mathe par phaila hua hai

sada aa rahi hai

ye bazar hai misr ka

is mein mear ki koi qimat nahin hai

yahan ek anTi pe yusuf se paighambar bik chuke hain

yahan balki qimat hi mear Thahre