gandhi

ai rahnumā-e-hind ai ḳhidmat-guzār-e-qaum

naqsh-e-qadam tire haiñ zamāne meñ yādgār

mushkil hai koī tujh sā mile jāñ-nisār-e-qaum

kahne ko yuuñ to mulk meñ leader haiñ be-shumār

ik aam aadmī thā to ye sab ko hai ḳhabar

qudrat ne raaz tujh ko magar kyā batā diyā

har manzil-e-hayāt se terā huā guzar

husn-e-amal ne kyā se tujhe kyā banā diyā

ā.īna tujh pe ho gayā ā.īn-e-zindagī

samjhā hai ḳhuub tū ne ahinsā ke baab ko

apne har ek kaam meñ apnā ke rāstī

tū ne uThāyā chehra-e-haq se naqāb ko

vo terī sādgī tire iḳhlās-o-ittiqā

majbūr hai zabān-e-qalam kyā bayāñ kare

īsār-o-zabt-o-hausla-o-jauhar-e-vafā

ausāf tere koī kahāñ tak ayaañ kare

yaksāñ the kul mazāhib-e-ālam tere liye

har zī-hayāt se tujhe duniyā meñ pyaar thā

bad-hāl the jo un ko uThāne ke vāste

ai dard-mañd qalb tirā be-qarār thā

lekin vatan pe āfat-e-tāza hai aa ga.ī

phir ho rahā hai zer-o-zabar amn kā nizām

āñdhī havā-o-hirs kī bhārat pe chhā ga.ī

farzand tere bhuul chuke haiñ tirā payām

āzād ho ke bhī na koī yuuñ ġhulām ho

bā-īñ-hama duā hai vatan shād-kām ho

ai rahnuma-e-hind ai KHidmat-guzar-e-qaum

naqsh-e-qadam tere hain zamane mein yaadgar

mushkil hai koi tujh sa mile jaan-nisar-e-qaum

kahne ko yun to mulk mein leader hain be-shumar

ek aam aadmi tha to ye sab ko hai KHabar

qudrat ne raaz tujh ko magar kya bata diya

har manzil-e-hayat se tera hua guzar

husn-e-amal ne kya se tujhe kya bana diya

aaina tujh pe ho gaya aain-e-zindagi

samjha hai KHub tu ne ahinsa ke bab ko

apne har ek kaam mein apna ke rasti

tu ne uThaya chehra-e-haq se naqab ko

wo teri sadgi tere iKHlas-o-ittiqa

majbur hai zaban-e-qalam kya bayan kare

isar-o-zabt-o-hausla-o-jauhar-e-wafa

ausaf tere koi kahan tak ayan kare

yaksan the kul mazahib-e-alam tere liye

har zi-hayat se tujhe duniya mein pyar tha

bad-haal the jo un ko uThane ke waste

ai dard-mand qalb tera be-qarar tha

lekin watan pe aafat-e-taza hai aa gai

phir ho raha hai zer-o-zabar amn ka nizam

aandhi hawa-o-hirs ki bhaarat pe chha gai

farzand tere bhul chuke hain tera payam

aazad ho ke bhi na koi yun ghulam ho

ba-in-hama dua hai watan shad-kaam ho