gaDhi mera

maiñ thā aur phuul the ik gosha-e-tanhā.ī meñ

ham se kuchh duur parinde bhī the gahrā.ī meñ

nīl-gūñ āsmāñ shaffāf nazar aatā thā

bahtā paanī bhī bahut saaf nazar aatā thā

dhuup thī tez magar dil ko bhalī lagtī thī

vādī-e-sabz mohabbat kī galī lagtī thī

chādareñ oḌhe hue laḌkiyāñ hairān sī thiiñ

mere ham-rāh vo ik ḳhvāb-e-pareshān sī thiiñ

baat karte hue hañste hue Dar jaatī thiiñ

surḳh phūloñ ke simaTne pe bikhar jaatī thiiñ

jism se dil ke ta.alluq kā havāla bhī na thā

khoī chīzoñ ko koī DhūñDne vaalā bhī na thā

har taraf guzre hue vaqt kī ḳhāmoshī thī

yaad ik yaad na thī sirf farāmoshī thī

ḳhatm hotī huī ik shaam adhūrī thī bahut

zindagī se ye mulāqāt zarūrī thī bahut

main tha aur phul the ek gosha-e-tanhai mein

hum se kuchh dur parinde bhi the gahrai mein

nil-gun aasman shaffaf nazar aata tha

bahta pani bhi bahut saf nazar aata tha

dhup thi tez magar dil ko bhali lagti thi

wadi-e-sabz mohabbat ki gali lagti thi

chadaren oDhe hue laDkiyan hairan si thin

mere ham-rah wo ek KHwab-e-pareshan si thin

baat karte hue hanste hue Dar jati thin

surKH phulon ke simaTne pe bikhar jati thin

jism se dil ke talluq ka hawala bhi na tha

khoi chizon ko koi DhunDne wala bhi na tha

har taraf guzre hue waqt ki KHamoshi thi

yaad ek yaad na thi sirf faramoshi thi

KHatm hoti hui ek sham adhuri thi bahut

zindagi se ye mulaqat zaruri thi bahut