gaDhon wali laDki

jab vo boltī hai

jab chup ho jaatī hai

aur jab hañstī hai

aur rotī hai jab

us ke ruḳhsāroñ meñ

hoñToñ ke kināroñ par

abrūoñ ke paas

chāh-e-zaqan kī tarah

Dimple paḌte haiñ

aur mazīd Dimple paḌte haiñ

jab vo qahqaha lagātī hai

aur jab gaane lagtī hai

ḳhush hote vaqt bhī

jis tarah dukh meñ

aañsū bahāte hue

jo gaal ke gaḌhe meñ jā girte haiñ

ġhusse meñ

chehre par bhañvar ban jaate haiñ

parinde jis par chakrāte haiñ

udāsī meñ qadīm khañDar

billiyāñ jahāñ chīḳhtī haiñ

aur karb meñ bhī

jab ye us narm maas ko Dhāñptā hai

to ek black hole

us ke puure vajūd ko

nigalne lagtā hai

jab wo bolti hai

jab chup ho jati hai

aur jab hansti hai

aur roti hai jab

us ke ruKHsaron mein

honTon ke kinaron par

abruon ke pas

chah-e-zaqan ki tarah

Dimple paDte hain

aur mazid Dimple paDte hain

jab wo qahqaha lagati hai

aur jab gane lagti hai

KHush hote waqt bhi

jis tarah dukh mein

aansu bahate hue

jo gal ke gaDhe mein ja girte hain

ghusse mein

chehre par bhanwar ban jate hain

parinde jis par chakraate hain

udasi mein qadim khanDar

billiyan jahan chiKHti hain

aur karb mein bhi

jab ye us narm mas ko Dhanpta hai

to ek black hole

us ke pure wajud ko

nigalne lagta hai