ghair-nisabi tariKH

shāhī darbār maiñ ḳhādim-e-ḳhās kā elaan

taḳhliya

raqs-e-junūñ-ḳhez pe nau-ḳhez badan

shahr maiñ ādam-e-ḳhākī kai lahū kī qīmat

dene aa.e haiñ mahārāj ke maiḳhāne maiñ

rañg aur nuur kī barsāt ke beach

kaun dekhegā be-sar kī lāsheñ

nau-badan jām-e-tahayyur kā nayā zā.iqa haiñ

jan pe do-laḳht kiye jaate haiñ mulkoñ ke badan

shāhī darbār meñ mahārāj kā elaan

sāhibo

dhuñd kī tahzīb kā parchār karo

jin par na.are haiñ likhe ghar vo tah-e-ḳhāk karo

shahr meñ gūñje faqat naġhma-e-tausīf-e-riyā

hurmat-e-harf ho pāband-e-shikoh-e-aivāñ

zikr mat ho kahīñ jalte hue ḳhiyām kā bas

sirf tārīḳh maiñ chamke mirā farmān-e-shahī

shāhī darbār meñ vazīr-e-bā-tadbīr kā mashvara

taḳhliya

sāhibo ye vaqt hai sarshārī kā

faisle kal pe uThā rakhte haiñ mustaqbil ke

is samay shahr meñ barpā karo jaadū koī

log masrūf raheñ vaqt guzar jaa.e bas

ḳhaak ho jā.eñgī sadiyāñ yūñhī qadmoñ ke tale

shāhī darbār meñ mahārāj kā muḳhbir-e-ḳhās ko hukm

lahn-e-sālār batā haal zamāne kā mujhe

us meñ bas mujh ko batā merī ḳhabar kī bābat

mat sunā ḳhasta zamānoñ kī shikasta bāteñ

lafz likh mere liye nok-e-qalam se aur phir

shahar-bhar meñ yahī tārīḳh munādī kar de

vaqt ke saare mo.arriḳh kareñ bai.at us kī

phuul par ḳhuun nahīñ thā vo nam-e-shabnam thā

ek ḳhāmosh riyāzat thī ajal kā chakkar

be-badan ḳhvāb the tahzīb kā nau-rafta-mizāj

shāhī darbār se bāhar re.āyā kā mizāj

dosto yuuñ hī salāmat rahe aivāñ kā vaqār

rizq maltā rahe ra.anā.ī kā āñkhoñ ko yūñhī

yuuñ hī baTtī rahe ḳhairāt-e-kafan gard-e-yaqīñ

yuuñ hī miltī rahe qabroñ ke liye muft zamīñ

dosto yuuñ hī salāmat rahe aivāñ kā vaqār

shahi darbar main KHadim-e-KHas ka elan

taKHliya

raqs-e-junun-KHez pe nau-KHez badan

shahr main aadam-e-KHaki kai lahu ki qimat

dene aae hain mahaaraj ke maiKHane main

rang aur nur ki barsat ke beach

kaun dekhega be-sar ki lashen

nau-badan jam-e-tahayyur ka naya zaiqa hain

jan pe do-laKHt kiye jate hain mulkon ke badan

shahi darbar mein mahaaraj ka elan

sahibo

dhund ki tahzib ka parchaar karo

jin par nare hain likhe ghar wo tah-e-KHak karo

shahr mein gunje faqat naghma-e-tausif-e-riya

hurmat-e-harf ho paband-e-shikoh-e-aiwan

zikr mat ho kahin jalte hue KHiyam ka bas

sirf tariKH main chamke mera farman-e-shahi

shahi darbar mein wazir-e-ba-tadbir ka mashwara

taKHliya

sahibo ye waqt hai sarshaari ka

faisle kal pe uTha rakhte hain mustaqbil ke

is samay shahr mein barpa karo jadu koi

log masruf rahen waqt guzar jae bas

KHak ho jaengi sadiyan yunhi qadmon ke tale

shahi darbar mein mahaaraj ka muKHbir-e-KHas ko hukm

lahn-e-salar bata haal zamane ka mujhe

us mein bas mujh ko bata meri KHabar ki babat

mat suna KHasta zamanon ki shikasta baaten

lafz likh mere liye nok-e-qalam se aur phir

shahar-bhar mein yahi tariKH munadi kar de

waqt ke sare moarriKH karen baiat us ki

phul par KHun nahin tha wo nam-e-shabnam tha

ek KHamosh riyazat thi ajal ka chakkar

be-badan KHwab the tahzib ka nau-rafta-mizaj

shahi darbar se bahar reaya ka mizaj

dosto yun hi salamat rahe aiwan ka waqar

rizq malta rahe ranai ka aankhon ko yunhi

yun hi baTti rahe KHairaat-e-kafan gard-e-yaqin

yun hi milti rahe qabron ke liye muft zamin

dosto yun hi salamat rahe aiwan ka waqar