گیلی لایی مر گیا

ہاں یہ سچ ہے

گیلیلیو مر گیا ہے

مگر اس کی عینک

مرے پاس دھری ہے

وہ اکثر یاد آتا ہے

اور اس لئے اکثر

اس کی عینک نکال لاتا ہوں

ستاروں کی گردشیں

اب تیز لگتی ہیں

گیلیلیو گیلی لایی

جانتا ہوگا

گردشوں کی تیز گامی

ٹوٹتے تاروں کا مطلب

وہ بہتر جانتا ہوگا

بتایا تو تھا اس نے

مگر شاید

اک میرے سوا اس کو

کسی نے ٹھیک سے سمجھا نہیں ہے

گیلی لایی کی عینک سے

جب بھی دیکھتا ہوں

مداروں کی ہلچل بڑھ رہی ہے

درخشاں ہر ستارہ

آتشیں نظر آنے لگا ہے