غم دل

دل کی وحشت کو اک زمانہ ہوا

غم کی شدت کو اک زمانہ ہوا

کوئی احساس تک نہیں باقی

حسرت و یاس تک نہیں باقی

کیوں تجھے یاد کر رہی ہوں میں

یاد تیری رلا رہی ہے آج

دل میں ہوکیں اٹھا رہی ہے آج

زندگی ہو گئی ہے پھر ویراں

پھر سے آنکھیں ہوئی ہیں اشک فشاں

ہاں تجھے یاد کر رہی ہوں میں

چھوٹ کر تجھ سے مل سکا نہ سکوں

آرزوئیں تمام ہو گئیں خوں

خاک میں مل گئے بلند خیال

کیا سے کیا ہو گیا ہے اپنا حال

پھر تجھے یاد کر رہی ہوں میں

دل بہلتا نہیں کہیں میرا

دوست تجھ سا کوئی نہیں میرا

وادیٔ زندگی میں حیراں ہوں

صورت بوئے گل پریشاں ہوں

آ تجھے یاد کر رہی ہوں میں

تجھ سے ملنے کی اب امید نہیں

خواب میں بھی مجال دید نہیں

ہجر کی تلخیوں کو سہنا ہے

عمر بھر قید غم میں رہنا ہے

کیوں تجھے یاد کر رہی ہوں میں