gham-e-dil

dil kī vahshat ko ik zamāna huā

ġham kī shiddat ko ik zamāna huā

koī ehsās tak nahīñ baaqī

hasrat-o-yās tak nahīñ baaqī

kyoñ tujhe yaad kar rahī huuñ maiñ

yaad terī rulā rahī hai aaj

dil meñ hūkeñ uThā rahī hai aaj

zindagī ho ga.ī hai phir vīrāñ

phir se āñkheñ huī haiñ ashk-fishāñ

haañ tujhe yaad kar rahī huuñ maiñ

chhūT kar tujh se mil sakā na sukūñ

ārzūeñ tamām ho ga.iiñ ḳhuuñ

ḳhaak meñ mil ga.e buland ḳhayāl

kyā se kyā ho gayā hai apnā haal

phir tujhe yaad kar rahī huuñ maiñ

dil bahaltā nahīñ kahīñ merā

dost tujh sā koī nahīñ merā

vādī-e-zindagī meñ hairāñ huuñ

sūrat-e-bū-e-gul pareshāñ huuñ

aa tujhe yaad kar rahī huuñ maiñ

tujh se milne kī ab umiid nahīñ

ḳhvāb meñ bhī majāl-e-dīd nahīñ

hijr kī talḳhiyoñ ko sahnā hai

'umr-bhar qaid-e-ġham meñ rahnā hai

kyoñ tujhe yaad kar rahī huuñ maiñ

dil ki wahshat ko ek zamana hua

gham ki shiddat ko ek zamana hua

koi ehsas tak nahin baqi

hasrat-o-yas tak nahin baqi

kyon tujhe yaad kar rahi hun main

yaad teri rula rahi hai aaj

dil mein huken uTha rahi hai aaj

zindagi ho gai hai phir viran

phir se aankhen hui hain ashk-fishan

han tujhe yaad kar rahi hun main

chhuT kar tujh se mil saka na sukun

aarzuen tamam ho gain KHun

KHak mein mil gae buland KHayal

kya se kya ho gaya hai apna haal

phir tujhe yaad kar rahi hun main

dil bahalta nahin kahin mera

dost tujh sa koi nahin mera

wadi-e-zindagi mein hairan hun

surat-e-bu-e-gul pareshan hun

aa tujhe yaad kar rahi hun main

tujh se milne ki ab umid nahin

KHwab mein bhi majal-e-did nahin

hijr ki talKHiyon ko sahna hai

'umr-bhar qaid-e-gham mein rahna hai

kyon tujhe yaad kar rahi hun main