gham-e-hayat

ġham-e-hayāt ke naġhmoñ kā maiñ muġhannī huuñ

ġham-e-hayāt kī lazzat kā huuñ maiñ shaidā.ī

ye jazba jo dil-e-betāb se fuzūñ-tar hai

kahīñ se gardish-e-shām-o-sahar uḌā laa.ī

nazar ko detā hai ye raushnī tajassus kī

ye ġham banātā hai dil ko dil-e-tamannā.ī

ye rāz-hā-e-tag-o-dau ko faash kartā hai

ye rāh-rau ko sikhātā hai jāda-paimā.ī

isī se garmī-e-bazm-e-hayāt baaqī hai

yahī hai dahr ke har inqalāb kā baanī

kahīñ na Das le ye tanhā.ī-e-hayāt mujhe

tū ġham se siikh le ādāb-e-bazm-ārā.ī

na kar hisār-e-man-o-tū meñ apnā ġham mahdūd

ki ho ye aam to phir zindagī hai āfāqī

gham-e-hayat ke naghmon ka main mughanni hun

gham-e-hayat ki lazzat ka hun main shaidai

ye jazba jo dil-e-betab se fuzun-tar hai

kahin se gardish-e-sham-o-sahar uDa lai

nazar ko deta hai ye raushni tajassus ki

ye gham banata hai dil ko dil-e-tamannai

ye raaz-ha-e-tag-o-dau ko fash karta hai

ye rah-rau ko sikhata hai jada-paimai

isi se garmi-e-bazm-e-hayat baqi hai

yahi hai dahr ke har inqalab ka bani

kahin na Das le ye tanhai-e-hayat mujhe

tu gham se sikh le aadab-e-bazm-arai

na kar hisar-e-man-o-tu mein apna gham mahdud

ki ho ye aam to phir zindagi hai aafaqi