gham-gusari

dost māyūs na ho

silsile bante bigaḌte hī rahe haiñ akasr

terī palkoñ pe ye ashkoñ ke sitāre kaise

tujh ko ġham hai tirī mahbūb tujhe mil na sakī

aur jo ziist tarāshī thī tire ḳhvāboñ ne

jab paḌī choT haqā.eq kī to vo TuuT ga.ī

tujh ko ma.alūm hai maiñ ne bhī mohabbat kī thī

aur anjām-e-mohabbat bhī hai ma.alūm tujhe

tujh se pahle bhī bujhe haiñ yahāñ lākhoñ hī charāġh

terī nākāmī na.ī baat nahīñ dost mere

kis ne paa.ī hai ġham-e-zīst kī talḳhī se najāt

chār-o-nā-chār ye zahrāb sabhī piite haiñ

jaañ luTā dene ke farsūda fasānoñ pe na jā

kaun martā hai mohabbat meñ sabhī jiite haiñ

vaqt har zaḳhm ko har ġham ko miTā detā hai

vaqt ke saath ye sadma bhī guzar jā.egā

aur ye bāteñ jo dohrā.ī haiñ maiñ ne is vaqt

tū bhī ik roz inhī bātoñ ko dohrā.egā

dost māyūs na ho!

silsile bante bigaḌte hī rahe haiñ akasr

dost mayus na ho

silsile bante bigaDte hi rahe hain akasr

teri palkon pe ye ashkon ke sitare kaise

tujh ko gham hai teri mahbub tujhe mil na saki

aur jo zist tarashi thi tere KHwabon ne

jab paDi choT haqaeq ki to wo TuT gai

tujh ko malum hai main ne bhi mohabbat ki thi

aur anjam-e-mohabbat bhi hai malum tujhe

tujh se pahle bhi bujhe hain yahan lakhon hi charagh

teri nakaami nai baat nahin dost mere

kis ne pai hai gham-e-zist ki talKHi se najat

chaar-o-na-chaar ye zahrab sabhi pite hain

jaan luTa dene ke farsuda fasanon pe na ja

kaun marta hai mohabbat mein sabhi jite hain

waqt har zaKHm ko har gham ko miTa deta hai

waqt ke sath ye sadma bhi guzar jaega

aur ye baaten jo dohrai hain main ne is waqt

tu bhi ek roz inhi baaton ko dohraega

dost mayus na ho!

silsile bante bigaDte hi rahe hain akasr