ganga ashnan

ai bahār-e-gang ai sarmāya-e-pākīzgī

terī hastī tishna-kāmoñ ke liye mai-ḳhāna hai

dars-āmoz-e-fanā hai qatra qatra aab kā

yā habāboñ kī zabāñ par na.ara-e-mastāna hai

tere pahlū meñ hai ik doshīza-e-husn-o-jamāl

jis kī tasvīr-e-javānī ik sarāpā nuur hai

mauj ik aTkheliyoñ se chheḌ kartī hai vo aañkh

jo azal se kaif-āgīñ hai nashe meñ chuur hai

tālib-e-dīdār kā bahtā hai dil lahroñ ke saath

ma.arifat kā zauq paatā hai kañval ke phuul meñ

har kalī kī tah meñ sāmān-e-latāfat dekh kar

aab kī chādar meñ ho jaate haiñ poshīda gunāh

nuur kā paikar banā deñgī lakīreñ mauj kī

dāġh-e-zulmat ko miTā degī ye aabī jalva-gāh

ġhair-mumkin hai ki dil meñ raushnī paidā na ho

bulbule paanī ke haiñ insān meñ vahdat kī sham.a

sādhūoñ ke vāste updesh hai maujoñ kā raag

haath meñ le kar khaḌe haiñ devtā jannat kī sham.a

terī mauj-e-muztarib hai aur dil-e-pur-josh hai

ya.anī betābi meñ us kā mudda.ā mil jā.egā

halqa-e-girdāb meñ naqsh-e-haqīqat dekh kar

ġhuncha-e-gul kī tarah dil kā kañval khil jā.egā

ai bahaar-e-gang ai sarmaya-e-pakizgi

teri hasti tishna-kaamon ke liye mai-KHana hai

dars-amoz-e-fana hai qatra qatra aab ka

ya hababon ki zaban par nara-e-mastana hai

tere pahlu mein hai ek doshiza-e-husn-o-jamal

jis ki taswir-e-jawani ek sarapa nur hai

mauj ek aTkheliyon se chheD karti hai wo aankh

jo azal se kaif-agin hai nashe mein chur hai

talib-e-didar ka bahta hai dil lahron ke sath

marifat ka zauq pata hai kanwal ke phul mein

har kali ki tah mein saman-e-latafat dekh kar

aab ki chadar mein ho jate hain poshida gunah

nur ka paikar bana dengi lakiren mauj ki

dagh-e-zulmat ko miTa degi ye aabi jalwa-gah

ghair-mumkin hai ki dil mein raushni paida na ho

bulbule pani ke hain insan mein wahdat ki shama

sadhuon ke waste updesh hai maujon ka rag

hath mein le kar khaDe hain dewta jannat ki shama

teri mauj-e-muztarib hai aur dil-e-pur-josh hai

yani betabi mein us ka muddaa mil jaega

halqa-e-girdab mein naqsh-e-haqiqat dekh kar

ghuncha-e-gul ki tarah dil ka kanwal khil jaega