ganga ka kinara

ḳhāmosh fazāoñ kā vo pur-kaif nazārā

vo nūr-e-sahar aur vo gangā kā kinārā

lahroñ kī kashākash meñ vo paanī kī ravānī

maujoñ ke talātum meñ vo bahtā huā dhārā

ik chādar-e-ābī pe zamurrad kī thī jhālar

yuuñ sabze se pur-zeb thā dariyā kā kinārā

us vaqt meñ aa kar kisī mahvash kā nahānā

vallāh ki firdaus-e-nazar kā vo nazārā

peshānī pe Tapkā thā ki ik naqsh-e-dil-ārā

yā husn kī qismat kā chamaktā thā sitārā

vo husn kī tasvīr vo ḳhūbī kā muraqqā

zāhid bhī jo dekhe na rahe zabt kā yaarā

jo uzv thā vo husn ke sāñche meñ Dhalā thā

thī us pe vo sarmast javānī sitam-ārā

vo husn ke dariyā kī thī ik māhī-e-be-tāb

chhīñToñ se vafā ke jise ḳhāliq ne nikhārā

uThte the qadam bār-e-nazar se ba-takalluf

go chashm-e-tamāshā ko na thā diid kā yaarā

āñchal ko sañbhāle hue andāz se aa.ī

karne lagī aa kar lab-e-dariyā kā nazārā

har samt jo paḌtī thiiñ nigāheñ mutavahhish

dil pā gayā merā jo nazar kā thā ishārā

ye dekh ke maiñ ho gayā sāhil se zarā duur

aur baiTh gayā baazū kā vaañ le ke sahārā

us maah ne har samt phir ik baar nazar kī

jab dekhā ki sunsān hai dariyā kā kinārā

lete hue añgḌā.ī kiyā zulfoñ ko barham

aur naaz se paanī meñ qadam us ne utārā

uThtī huī maujoñ meñ talātum huā barpā

soī huī lahroñ ne bhī sar apnā ubhārā

qadmoñ ko jamā.e hue aape ko sañbhāle

maujoñ se baham khel rahī thī vo dil-ārā

paanī meñ thā us vaqt vo rañgīnī kā aalam

goyā hai mai-e-nāb kā bahtā huā dhārā

kis tarah vo dariyā se nahā.e huī niklī

aage nahīñ 'qaisar' lab-e-iz.hār ko yaarā

bikhrī huī zulfoñ se vo girte hue qatre

TuuTe koī jis tarah sitāre pe sitārā

de sāqi-e-mehvash ki nahīñ zabt kā yaarā

mahrūmī-e-rindāñ tujhe kyūñkar hai gavārā

so.e bhī ye mai-ḳhvār to le le ke tirā naam

chauñke jo kabhī ḳhvāb se tujh ko hī pukārā

tujh ko tirī be-tāb nigāhoñ kī qasam hai

merī hī tarah dekh le mujh ko bhī ḳhudārā

merī hī nigāhoñ ne hasīñ tujh ko banāyā

merī hī mohabbat ne tirā husn nikhārā

KHamosh fazaon ka wo pur-kaif nazara

wo nur-e-sahar aur wo ganga ka kinara

lahron ki kashakash mein wo pani ki rawani

maujon ke talatum mein wo bahta hua dhaara

ek chadar-e-abi pe zamurrad ki thi jhaalar

yun sabze se pur-zeb tha dariya ka kinara

us waqt mein aa kar kisi mahwash ka nahana

wallah ki firdaus-e-nazar ka wo nazara

peshani pe Tapka tha ki ek naqsh-e-dil-ara

ya husn ki qismat ka chamakta tha sitara

wo husn ki taswir wo KHubi ka muraqqa

zahid bhi jo dekhe na rahe zabt ka yara

jo uzw tha wo husn ke sanche mein Dhala tha

thi us pe wo sarmast jawani sitam-ara

wo husn ke dariya ki thi ek mahi-e-be-tab

chhinTon se wafa ke jise KHaliq ne nikhaara

uThte the qadam bar-e-nazar se ba-takalluf

go chashm-e-tamasha ko na tha did ka yara

aanchal ko sanbhaale hue andaz se aai

karne lagi aa kar lab-e-dariya ka nazara

har samt jo paDti thin nigahen mutawahhish

dil pa gaya mera jo nazar ka tha ishaara

ye dekh ke main ho gaya sahil se zara dur

aur baiTh gaya bazu ka wan le ke sahaara

us mah ne har samt phir ek bar nazar ki

jab dekha ki sunsan hai dariya ka kinara

lete hue angDai kiya zulfon ko barham

aur naz se pani mein qadam us ne utara

uThti hui maujon mein talatum hua barpa

soi hui lahron ne bhi sar apna ubhaara

qadmon ko jamae hue aape ko sanbhaale

maujon se baham khel rahi thi wo dil-ara

pani mein tha us waqt wo rangini ka aalam

goya hai mai-e-nab ka bahta hua dhaara

kis tarah wo dariya se nahae hui nikli

aage nahin 'qaisar' lab-e-izhaar ko yara

bikhri hui zulfon se wo girte hue qatre

TuTe koi jis tarah sitare pe sitara

de saqi-e-mehwash ki nahin zabt ka yara

mahrumi-e-rindan tujhe kyunkar hai gawara

soe bhi ye mai-KHwar to le le ke tera nam

chaunke jo kabhi KHwab se tujh ko hi pukara

tujh ko teri be-tab nigahon ki qasam hai

meri hi tarah dekh le mujh ko bhi KHudara

meri hi nigahon ne hasin tujh ko banaya

meri hi mohabbat ne tera husn nikhaara