ganga ke kinare

jab ġham kā añdherā chhātā hai

jab duniyā se ghabrātī huuñ

dil merā jab bhar aatā hai

jab yās-zada ho jaatī huuñ

ḳhud paañv mirā uTh jaatā hai

gangā ke kināre aatī huuñ

ye us kī chamak motī kī laḌī

ye us kī fazā billor-numā

ye us kī damak mar-mar jaisī

ye us kī sapedī nūr-numā

ye us kī jhalak chāñdī sī jaḌī

ye us kī tajallī tūr-numā

ye us kī mahak phūloñ meñ basī

ye us kī nigāheñ hūr-numā

ye halke-halke kuchh naġhme

jo nāzuk qatre gaate haiñ

ye saaf achhūte kuchh shīshe

jo maujoñ ko chamkāte haiñ

ye narm jhakole paanī ke

jo lahroñ meñ bal khāte haiñ

ye sard havāoñ ke jhoñke

jo gangā meñ lahrāte haiñ

karte haiñ ajab hairān mujhe

hai ruuh meñ paidā kaifiyyat

ho jaate haiñ sākin sab jazbe

hai qalb kī sākit ab hālat

uThtī haiñ jo maujeñ iThlā ke

hotī hai nazar ko ik hairat

chalte haiñ jo paanī ke jhāle

baḌhtī hai tabī.at kī hasrat

din-rāt hī kyoñ sargarm-e-amal

kyoñ chupke-chupke gaatī hai

kyoñ dil meñ machī hai ye halchal

kyoñ halke-halke aatī hai

chitvan meñ paḌe haiñ lākhoñ bal

kis soch meñ Duubī jaatī hai

chhā.e haiñ udāsī ke bādal

jazbāt meñ lahreñ khātī hai

kyā raaz hai tere dil meñ nihāñ

aa apnā haal sunā gangā

siine meñ hai maḳhfī ġham kā dhuāñ

kuchh apnā raaz batā gangā

hai raag tirā bulbul kī fuġhāñ

phir ġham kī taan lagā gangā

kar mujh ko zarā mad.hosh-e-bayāñ

phir chupke-chupke gā gangā

jo dard hai mere dil meñ nihāñ

kyā is kā huā kuchh tujh pe asar

siine meñ jo sho.ale haiñ maḳhfī

kyā in kā haal khulā tujh par

jo aag hai mere dil meñ lagī

kyā is kā uḌā hai koī sharar

jo dard jigar meñ hai mere

kyā is se tū bhī huī muztar

aa apne vatan kī izzat par

kuchh ashk-e-yās bahā.eñ ham

aa hind kī shām-e-hasrat par

ik sham.a-e-dard jalā.eñ ham

aa apnī shikasta qismat par

ro-ro ke sab ko rulā.eñ ham

aa qaum kī qabr-e-vīrāñ par

do aañsū mil ke chaḌhā.eñ ham

jab gham ka andhera chhata hai

jab duniya se ghabraati hun

dil mera jab bhar aata hai

jab yas-zada ho jati hun

KHud panw mera uTh jata hai

ganga ke kinare aati hun

ye us ki chamak moti ki laDi

ye us ki faza billor-numa

ye us ki damak mar-mar jaisi

ye us ki sapedi nur-numa

ye us ki jhalak chandi si jaDi

ye us ki tajalli tur-numa

ye us ki mahak phulon mein basi

ye us ki nigahen hur-numa

ye halke-halke kuchh naghme

jo nazuk qatre gate hain

ye saf achhute kuchh shishe

jo maujon ko chamkate hain

ye narm jhakole pani ke

jo lahron mein bal khate hain

ye sard hawaon ke jhonke

jo ganga mein lahraate hain

karte hain ajab hairan mujhe

hai ruh mein paida kaifiyyat

ho jate hain sakin sab jazbe

hai qalb ki sakit ab haalat

uThti hain jo maujen iThla ke

hoti hai nazar ko ek hairat

chalte hain jo pani ke jhaale

baDhti hai tabiat ki hasrat

din-raat hi kyon sargarm-e-amal

kyon chupke-chupke gati hai

kyon dil mein machi hai ye halchal

kyon halke-halke aati hai

chitwan mein paDe hain lakhon bal

kis soch mein Dubi jati hai

chhae hain udasi ke baadal

jazbaat mein lahren khati hai

kya raaz hai tere dil mein nihan

aa apna haal suna ganga

sine mein hai maKHfi gham ka dhuan

kuchh apna raaz bata ganga

hai rag tera bulbul ki fughan

phir gham ki tan laga ganga

kar mujh ko zara madhosh-e-bayan

phir chupke-chupke ga ganga

jo dard hai mere dil mein nihan

kya is ka hua kuchh tujh pe asar

sine mein jo shoale hain maKHfi

kya in ka haal khula tujh par

jo aag hai mere dil mein lagi

kya is ka uDa hai koi sharar

jo dard jigar mein hai mere

kya is se tu bhi hui muztar

aa apne watan ki izzat par

kuchh ashk-e-yas bahaen hum

aa hind ki sham-e-hasrat par

ek shama-e-dard jalaen hum

aa apni shikasta qismat par

ro-ro ke sab ko rulaen hum

aa qaum ki qabr-e-viran par

do aansu mil ke chaDhaen hum