gard-baad

bagūlā

ḳhāk-zāda farsh uftāda

havā jārūb kartī hai to us kā jism Dhaltā hai

safar kī gardisheñ saudā-e-bātin muntashir socheñ

hayūle sā bagūlā

be-shabāhat qais-zāda

shahr kī galiyoñ meñ chakrātā hai

ḳhud maiñ chīḳhtā pal meñ ka.ī qarnoñ ke bal khātā hai

gard zard kā jhūlā

bagūlā

hijr-zāda balki hijrat-zād

sahrā se abhī bastī meñ aayā thā

Dare sahme hue logoñ kī āñkheñ hashr-basta thiiñ

abhī do-chār galiyāñ tai na ho pā.īñ

ḳham-o-pech us kī rah meñ aa.e

zarre kasmasā.e

jism ke a.azā jhaḌe

āhista āhista uḌaan andoh meñ badlī

aur ab logoñ ke qadmoñ meñ koī vāmāñda-gard

be-kināra fatāda hai

fardā kī dhun meñ koī ho bas ik hayūlā hai

mire bātin meñ jo kuchh pech khātā hai

hayūlā yā bagūlā hai

maiñ paanī aur miTTī se bahut Dartā huuñ

hijrat se guzartā huuñ

ubhartā huuñ bikhartā huuñ

bagula

KHak-zada farsh uftada

hawa jarub karti hai to us ka jism Dhalta hai

safar ki gardishen sauda-e-baatin muntashir sochen

hayule sa bagula

be-shabahat qais-zada

shahr ki galiyon mein chakraata hai

KHud main chiKHta pal mein kai qarnon ke bal khata hai

gard zard ka jhula

bagula

hijr-zada balki hijrat-zad

sahra se abhi basti mein aaya tha

Dare sahme hue logon ki aankhen hashr-basta thin

abhi do-chaar galiyan tai na ho pain

KHam-o-pech us ki rah mein aae

zarre kasmasae

jism ke aaza jhaDe

aahista aahista uDan andoh mein badli

aur ab logon ke qadmon mein koi wamanda-gard

be-kinara fatada hai

farda ki dhun mein koi ho bas ek hayula hai

mere baatin mein jo kuchh pech khata hai

hayula ya bagula hai

main pani aur miTTi se bahut Darta hun

hijrat se guzarta hun

ubharta hun bikharta hun