gharib naujawan

sarmāya-dār duniyā

hangāma-bār duniyā

bā-iḳhtiyār duniyā

nafrat-shi.ār duniyā

ik bad-nasīb huuñ maiñ

ya.anī ġharīb huuñ maiñ

har-dam sañvarne vaalo

phūloñ pe marne vaalo

kāñToñ se Darne vaalo

bach kar guzarne vaalo

ik bad-nasīb huuñ maiñ

ya.anī ġharīb huuñ maiñ

aish-o-tarab ke bando

jām-o-subū ko puujo

rātoñ ko din banāo

kyoñ merā haal pūchho

ik bad-nasīb huuñ maiñ

ya.anī ġharīb huuñ maiñ

sab muskurā rahe haiñ

charke lagā rahe haiñ

taskīn pā rahe haiñ

kis ko banā rahe haiñ

ik bad-nasīb huuñ maiñ

ya.anī ġharīb huuñ maiñ

hosh-o-ḳhirad se haarā

dīvāngī ko pyārā

nākāmiyoñ kā maarā

be-ās be-sahārā

ik bad-nasīb huuñ maiñ

ya.anī ġharīb huuñ maiñ

tūfāñ meñ bahne vaalā

har jabr sahne vaalā

kuchh bhī na kahne vaalā

ḳhud.dār rahne vaalā

ik bad-nasīb huuñ maiñ

ya.anī ġharīb huuñ maiñ

har dil kī ġham-gusārī

har ġham pe ashk-bārī

ehsās kā bhikārī

ehsās kā pujārī

ik bad-nasīb huuñ maiñ

ya.anī ġharīb huuñ maiñ

merī javāñ umīdeñ

ḳhvāb-e-jināñ umīdeñ

hoñ kāmrāñ umīdeñ

aisī kahāñ umīdeñ

ik bad-nasīb huuñ maiñ

ya.anī ġharīb huuñ maiñ

ye chāñdnī ye taare

ye scene ye nazāre

al-qissa aish saare

mujh se raheñ kināre

ik bad-nasīb huuñ maiñ

ya.anī ġharīb huuñ maiñ

ye ḳhush-gavār sub.heñ

ye kaif-bār maujeñ

ye pī kahāñ kī jāpeñ

sāz-e-tarab na chheḌeñ

ik bad-nasīb huuñ maiñ

ya.anī ġharīb huuñ maiñ

ye kaun gā rahā hai

aalam pe chhā rahā hai

be-ḳhud banā rahā hai

kuchh yaad aa rahā hai

ik bad-nasīb huuñ maiñ

ya.anī ġharīb huuñ maiñ

har taan dil-nashīñ hai

ma.asūm hai hasīñ hai

sad kausar āfrīñ hai

mere liye nahīñ hai

ik bad-nasīb huuñ maiñ

ya.anī ġharīb huuñ maiñ

sarmaya-dar duniya

hangama-bar duniya

ba-iKHtiyar duniya

nafrat-shiar duniya

ek bad-nasib hun main

yani gharib hun main

har-dam sanwarne walo

phulon pe marne walo

kanTon se Darne walo

bach kar guzarne walo

ek bad-nasib hun main

yani gharib hun main

aish-o-tarab ke bando

jam-o-subu ko pujo

raaton ko din banao

kyon mera haal puchho

ek bad-nasib hun main

yani gharib hun main

sab muskura rahe hain

charke laga rahe hain

taskin pa rahe hain

kis ko bana rahe hain

ek bad-nasib hun main

yani gharib hun main

hosh-o-KHirad se haara

diwangi ko pyara

nakaamiyon ka mara

be-as be-sahaara

ek bad-nasib hun main

yani gharib hun main

tufan mein bahne wala

har jabr sahne wala

kuchh bhi na kahne wala

KHuddar rahne wala

ek bad-nasib hun main

yani gharib hun main

har dil ki gham-gusari

har gham pe ashk-bari

ehsas ka bhikari

ehsas ka pujari

ek bad-nasib hun main

yani gharib hun main

meri jawan umiden

KHwab-e-jinan umiden

hon kaamran umiden

aisi kahan umiden

ek bad-nasib hun main

yani gharib hun main

ye chandni ye tare

ye scene ye nazare

al-qissa aish sare

mujh se rahen kinare

ek bad-nasib hun main

yani gharib hun main

ye KHush-gawar subhen

ye kaif-bar maujen

ye pi kahan ki japen

saz-e-tarab na chheDen

ek bad-nasib hun main

yani gharib hun main

ye kaun ga raha hai

aalam pe chha raha hai

be-KHud bana raha hai

kuchh yaad aa raha hai

ek bad-nasib hun main

yani gharib hun main

har tan dil-nashin hai

masum hai hasin hai

sad kausar aafrin hai

mere liye nahin hai

ek bad-nasib hun main

yani gharib hun main