gharib shahr

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

ki bamba.ī kā ye gambhīr sin-rasīda shahr

imāratoñ kā ye phailā huā ghanā jañgal

malāmatoñ kā balāoñ kā raqs-ḳhāna hai

har ek shaḳhs hai āseb-e-zar meñ naza.a-ba-lab

ki saañs khul nahīñ saktī hai mar nahīñ saktā

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

ki bamba.ī kā hasīñ shahr koī aurat hai

sajī-sajā.ī sañvārī huī javāñ aurat

pa jis kī ruuh gunāhoñ kā ik jahannam hai

javān jism jhulaste haiñ us ke sho.aloñ meñ

magar ye jaan ke har ik javāñ hai mohr-ba-lab

mire gunāh ko rusvā.iyāñ nahīñ miltīñ

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

ye shahr shahr nigārān-e-māh-paiakar hai

yahāñ pe chāñd añdheroñ meñ qatl hote haiñ

yahāñ hunar ko matā-e-vafā mayassar hai

yahāñ pe roTiyāñ rakkhī haiñ jūtiyoñ ke tale

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

ki aadmī to bahar-hāl be-sahārā hai

yahāñ savāl mile rāstoñ pe so.e hue

yahāñ javāb mile uljhanoñ meñ kho.e hue

yahāñ vo haath mile jin kā lams zinda hai

yahāñ vo jism mile jin kī aag raushan hai

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

udaas habs-zada dopahar kā har lamha

sabāt-e-tishna-labī aazmā ke jaatā hai

fasāna shab-e-hijrāñ kā tuul hai jaise

umīd-e-vasl meñ jiinā sikhā ke jaatā hai

kuchh aise kaTte haiñ din raat kyā ḳhabar tum ko

matā-e-umr luTātā huuñ shahr-e-ġhurbat meñ

tumhārī diid kī ummīd miT ga.ī hotī

to apnī maut ik ilzām thī mohabbat meñ

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ

kisī udaas shab-e-māh meñ kabhī jab maiñ

garajte chīḳhte chiñghāḌte samundar se

ye pūchhtā huuñ ''tujhe kab sukūn miltā hai

kabhī tahoñ meñ hai halchal kabhī kināroñ par

kabhī hai sat.h pe shorīdgī kabhī dil meñ''

to thoḌī der samundar udaas rahtā hai

phir us ke ba.ad milātā hai haath maujoñ ke

ḳhudā gavāh samundar mujhe bulātā hai!

''ab aa ki mujh se tirī ruuh ko ilāqa hai

ab aa ki maiñ to tire paas aa nahīñ saktā''

ajiib haiñ mirī bāteñ ajiib hai ehsās

tumheñ ḳhudā na kare ye gumāñ guzarte hoñ!

ajib hain meri baaten ajib hai ehsas

tumhein KHuda na kare ye guman guzarte hon

ki bambai ka ye gambhir sin-rasida shahr

imaraton ka ye phaila hua ghana jangal

malamaton ka balaon ka raqs-KHana hai

har ek shaKHs hai aaseb-e-zar mein naza-ba-lab

ki sans khul nahin sakti hai mar nahin sakta

ajib hain meri baaten ajib hai ehsas

tumhein KHuda na kare ye guman guzarte hon

ki bambai ka hasin shahr koi aurat hai

saji-sajai sanwari hui jawan aurat

pa jis ki ruh gunahon ka ek jahannam hai

jawan jism jhulaste hain us ke shoalon mein

magar ye jaan ke har ek jawan hai mohr-ba-lab

mere gunah ko ruswaiyan nahin miltin

ajib hain meri baaten ajib hai ehsas

tumhein KHuda na kare ye guman guzarte hon

ye shahr shahr nigaran-e-mah-paiakar hai

yahan pe chand andheron mein qatl hote hain

yahan hunar ko mata-e-wafa mayassar hai

yahan pe roTiyan rakkhi hain jutiyon ke tale

ajib hain meri baaten ajib hai ehsas

tumhein KHuda na kare ye guman guzarte hon

ki aadmi to bahar-haal be-sahaara hai

yahan sawal mile raston pe soe hue

yahan jawab mile uljhanon mein khoe hue

yahan wo hath mile jin ka lams zinda hai

yahan wo jism mile jin ki aag raushan hai

ajib hain meri baaten ajib hai ehsas

tumhein KHuda na kare ye guman guzarte hon

udas habs-zada dopahar ka har lamha

sabaat-e-tishna-labi aazma ke jata hai

fasana shab-e-hijran ka tul hai jaise

umid-e-wasl mein jina sikha ke jata hai

kuchh aise kaTte hain din raat kya KHabar tum ko

mata-e-umr luTata hun shahr-e-ghurbat mein

tumhaari did ki ummid miT gai hoti

to apni maut ek ilzam thi mohabbat mein

ajib hain meri baaten ajib hai ehsas

tumhein KHuda na kare ye guman guzarte hon

kisi udas shab-e-mah mein kabhi jab main

garajte chiKHte chinghaDte samundar se

ye puchhta hun tujhe kab sukun milta hai

kabhi tahon mein hai halchal kabhi kinaron par

kabhi hai sath pe shoridgi kabhi dil mein

to thoDi der samundar udas rahta hai

phir us ke baad milata hai hath maujon ke

KHuda gawah samundar mujhe bulata hai!

ab aa ki mujh se teri ruh ko ilaqa hai

ab aa ki main to tere pas aa nahin sakta

ajib hain meri baaten ajib hai ehsas

tumhein KHuda na kare ye guman guzarte hon!