gharibon ka KHuda koi nahin

ek din thī dopahar kī saḳht garmī āshkār

dhuup kī shiddat thī misl-e-nār-e-dozaḳh qahr-bār

dāmanoñ meñ aag le kar thī davāñ bād-e-sumūm

thartharāhaT thī fazā meñ misl-e-mauj-e-sho.ala-bār

āsmāñ se sho'le girte the jhulastī thī zamīñ

garmī-e-roz-e-qayāmat kā namūna āshkār

garm jhoñke chal rahe the thiiñ havā kī yūrisheñ

tund sho'le surḳh zarre uḌ rahe the bār-bār

har kisī kī thā zabāñ par al-hafīz-o-al-ġhiyās

chilchilātī dhuup se thā zarra zarra be-qarār

rāste suune paḌe the raah par koī na thā

chal rahī thī har taraf lū aur bashar koī na thā

haañ magar thā rickshaw vaalā ek sargarm-e-safar

jis ko ġhurbat kar rahī thī maut se sīna-sipar

jo nigāh-e-ahl-e-sarvat meñ haqīr-o-pā.emāl

zindagānī vaqf thī jis kī barā.e ahl-e-zar

jis kī duniyā faqr-o-fāqa jis kī qismat ranj-o-ġham

jabr-e-qudrat hī ne jis ko kar diyā be-bāl-o-par

ḳhuun ban ban kar pasīna har bun-e-mū se ravāñ

chaar paise ke liye jo ban gayā thā jānvar

be-niyāz-e-'aish-o-'ishrat āshnā-e-dard-o-ġham

ek musht-e-ustuḳhvāñ āshufta-rau bā-chashm-e-tar

us ghaḌī bhī muztarib thā rizq-koshī ke liye

aag meñ vo jal rahā thā apnī roTī ke liye

kyā batā.ūñ kyā mirī āñkhoñ ne dekhā phir samāñ

uḌ rahī haiñ qalb-e-sozāñ se mire chingāriyāñ

daf'atan Thokar lagī aur chalte chalte gir paḌā

murġh-e-bismil dam ke dam meñ ban gayā vo nīm-jāñ

dekhtā huuñ jā ke maiñ to ḳhaak kā ik Dher thā

muñh se bāhar thī zabāñ aur ḳhuun hoñToñ se ravāñ

marne vaale kī kisī hasrat meñ thiiñ āñkheñ khulī

uTh rahā thā paikar-e-be-jāñ se rah rah kar dhuāñ

chārasāz-o-dastgīr-e-be-kasāñ koī na thā

kaun hotā be navāoñ kā bhalā mātam-kunāñ

muflisoñ kā dahr meñ mushkil-kushā koī nahīñ

ai 'zakī' sach hai ġharīboñ kā ḳhudā koī nahīñ

ek din thi dopahar ki saKHt garmi aashkar

dhup ki shiddat thi misl-e-nar-e-dozaKH qahr-bar

damanon mein aag le kar thi dawan baad-e-sumum

thartharahaT thi faza mein misl-e-mauj-e-shoala-bar

aasman se sho'le girte the jhulasti thi zamin

garmi-e-roz-e-qayamat ka namuna aashkar

garm jhonke chal rahe the thin hawa ki yurishen

tund sho'le surKH zarre uD rahe the bar-bar

har kisi ki tha zaban par al-hafiz-o-al-ghiyas

chilchilati dhup se tha zarra zarra be-qarar

raste sune paDe the rah par koi na tha

chal rahi thi har taraf lu aur bashar koi na tha

han magar tha rickshaw wala ek sargarm-e-safar

jis ko ghurbat kar rahi thi maut se sina-sipar

jo nigah-e-ahl-e-sarwat mein haqir-o-paemal

zindagani waqf thi jis ki barae ahl-e-zar

jis ki duniya faqr-o-faqa jis ki qismat ranj-o-gham

jabr-e-qudrat hi ne jis ko kar diya be-baal-o-par

KHun ban ban kar pasina har bun-e-mu se rawan

chaar paise ke liye jo ban gaya tha jaanwar

be-niyaz-e-'aish-o-'ishrat aashna-e-dard-o-gham

ek musht-e-ustuKHwan aashufta-rau ba-chashm-e-tar

us ghaDi bhi muztarib tha rizq-koshi ke liye

aag mein wo jal raha tha apni roTi ke liye

kya bataun kya meri aankhon ne dekha phir saman

uD rahi hain qalb-e-sozan se mere chingariyan

daf'atan Thokar lagi aur chalte chalte gir paDa

murgh-e-bismil dam ke dam mein ban gaya wo nim-jaan

dekhta hun ja ke main to KHak ka ek Dher tha

munh se bahar thi zaban aur KHun honTon se rawan

marne wale ki kisi hasrat mein thin aankhen khuli

uTh raha tha paikar-e-be-jaan se rah rah kar dhuan

chaarasaz-o-dastgir-e-be-kasan koi na tha

kaun hota be nawaon ka bhala matam-kunan

muflison ka dahr mein mushkil-kusha koi nahin

ai 'zaki' sach hai gharibon ka KHuda koi nahin