garm pani

raushnī par dhuñd kī tah

aa.ine ke naqsh phīke

shīshe ke us paar ib.hām-e-mujarrad

khiḌkiyoñ par āñsuoñ kī baaḌh

mūrateñ hoñ sūratoñ se jaise aarī

pighle chehroñ se thī har tasvīr bhārī

aur sukūt

bojh ho goyā basārat par namī

khiḌkī khulte hī magar

bāñheñ phailā kar havā ne

baḌh ke āñkheñ chuum liiñ

ā.inoñ ke aañsū poñchhe

rañg dho.e

shīshe kī tar-dāmanī kā qatra qatra khīñch Daalā

khiḌkī khulte hī vo saarī dhuñd jaise

raqs kartī bādaloñ kī or lapkī

muzmahil chādar nazar kī haTte haTte haT ga.ī

raushnī phir manzaroñ se paT ga.ī

raushni par dhund ki tah

aaine ke naqsh phike

shishe ke us par ibham-e-mujarrad

khiDkiyon par aansuon ki baDh

muraten hon suraton se jaise aari

pighle chehron se thi har taswir bhaari

aur sukut

bojh ho goya basarat par nami

khiDki khulte hi magar

banhen phaila kar hawa ne

baDh ke aankhen chum lin

aainon ke aansu ponchhe

rang dhoe

shishe ki tar-damani ka qatra qatra khinch Dala

khiDki khulte hi wo sari dhund jaise

raqs karti baadalon ki or lapki

muzmahil chadar nazar ki haTte haTte haT gai

raushni phir manzaron se paT gai