ghar ka wahid mard

mirī baajī

bahut der se mujhe āvāzeñ de rahī thiiñ

ġhāliban bāzār jaanā thā

jab se abbā kā intiqāl huā hai

vo har chhoTe-baḌe kaam ke liye

jab bhī kahīñ jātīñ mujhe saath le jaatī thiiñ

kabhī kabhī to mujhe bahut burā lagtā

aaj bhī maiñ apnā khel chhoḌ kar uThā

baajī ne sar par chādar Daalī ammī se paise liye

aur merā haath thaam kar chal diiñ

maiñ bahan se chimTā huā chal rahā thā

bāzār aur ghar kī darmiyānī tañg galī meñ

sar-e-shām tārīkī chhā jaatī thī

mujhe vahāñ se guzarte hue hamesha hī ḳhauf aatā thā

bāzār se vāpsī par galī meñ dāḳhil hote hī

mujhe ḳhauf ke saath kuchh ajiib sā ehsās huā

mere haath par

bahan kī giraft ziyāda hī saḳht ho ga.ī thī

nīm-tārīk sunsān galī ke bīcho-bīch chand naujavān laḌke

hamārā rāsta roke khaḌe the

vo achchhe log nahīñ lagte the

jab hī to merī baajī un se ḳhaufzada lag rahī thiiñ

achānak sab kuchh merī samajh meñ aa gayā

merī bahan mujhe apne sahāre ke liye

bāhar le kar jaatī thiiñ

abbā kī vafāt ke baa'd ghar ke andar maiñ hī to vāhid mard thā

ye ehsās hote hī

maiñ ne baajī ke haath se apnā haath chhuḌā liyā

aur un ke haath ko

apnī chhoTī chhoTī uñgliyoñ meñ mazbūtī se jakaḌ kar

baḌe e'timād ke saath nape tule qadam uThātā

un āvāra laḌkoñ ke ġhol se nikaltā chalā gayā

us lamhe mujhe aisā mahsūs huā jaise maiñ saat saal ke

kisī kamzor bachche kī bajā.e

sattā.īs saal kā ek tavānā mard huuñ

meri baji

bahut der se mujhe aawazen de rahi thin

ghaaliban bazar jaana tha

jab se abba ka intiqal hua hai

wo har chhoTe-baDe kaam ke liye

jab bhi kahin jatin mujhe sath le jati thin

kabhi kabhi to mujhe bahut bura lagta

aaj bhi main apna khel chhoD kar uTha

baji ne sar par chadar Dali ammi se paise liye

aur mera hath tham kar chal din

main bahan se chimTa hua chal raha tha

bazar aur ghar ki darmiyani tang gali mein

sar-e-sham tariki chha jati thi

mujhe wahan se guzarte hue hamesha hi KHauf aata tha

bazar se wapsi par gali mein daKHil hote hi

mujhe KHauf ke sath kuchh ajib sa ehsas hua

mere hath par

bahan ki giraft ziyaada hi saKHt ho gai thi

nim-tarik sunsan gali ke bicho-bich chand naujawan laDke

hamara rasta roke khaDe the

wo achchhe log nahin lagte the

jab hi to meri baji un se KHaufzada lag rahi thin

achanak sab kuchh meri samajh mein aa gaya

meri bahan mujhe apne sahaare ke liye

bahar le kar jati thin

abba ki wafat ke ba'd ghar ke andar main hi to wahid mard tha

ye ehsas hote hi

main ne baji ke hath se apna hath chhuDa liya

aur un ke hath ko

apni chhoTi chhoTi ungliyon mein mazbuti se jakaD kar

baDe e'timad ke sath nape tule qadam uThata

un aawara laDkon ke ghol se nikalta chala gaya

us lamhe mujhe aisa mahsus hua jaise main sat sal ke

kisi kamzor bachche ki bajae

sattais sal ka ek tawana mard hun